Lubanga olwongo Moses

Malube ki ngo ma otimme i komi nicake i kare ma okato ma wa rwate, gin ango ma itye ki pwoc pire?

Gin ango ma okelo par i cwinyi i cabit man, dok ngo ma imito wek jami obed maber?

Gin ango ma dano ma i kabedowu mito, dok waromo konyo ngat acel acel nining me cobo peko ma wanyuto ni?

Lok ango ma obedo i kare ma okato ma wa rwate? Gin ango ma wapwonyo i kom Lubanga ki dano?

I cokkewa mukato angec, in imoko tammi me keto gin ma ipwonyo i tic. Gin ango ma itimo, dok otimme nining?

Anga ma inywako kwede gin mo ki i lok ma okato ni? Gin gudok iye nining?

Wanongo jami mapol ma mite i kare ma okato ma wa rwate ki wa yubu me cobo jami ma mite ni. Otimo nining?

Kombeddi dong, wek wakwan lok me tin ki bot Lubanga...

²³ I lwak kare meno ducu, kabaka Ejipt oto iye woko, ci jo Icrael gubedo ka cur pi bedo opii, kun gikok gimito kony; ci kokogi pi bedo opii owinnye bot Lubaŋa. ²⁴ Ka Lubaŋa owinyo cur megi, ci opo pi gicikkene ki Abralm ki Icaka, ki Yakobo. ²⁵ Lubaŋa oneno jo Icrael, ci oŋeyo kit bedogi. ¹ Ka yam Moses tye ka kwayo lim pa won dakone, Yecero, ma ajwaka pa jo Midian, ci otero limme i tim ma yo tuŋ potoceŋ, owoto kwede wa i Koreb, ma got pa Lubaŋa, ² Lamalaika pa Rwot onen bote i leb mac ma i dye caka; oneno caka tye ka lyel mac pe gin mo waŋ, ³ Moses owacci, “Abiŋak wek anen gin ma nen madit-ti ki piŋo caka-ni pe waŋ woko.” ⁴ Ka Lubaŋa oneno ni en oŋak ka nenone Lubaŋa olwoŋe ki i caka, ni, “Moses! Moses!” En ogamo ni, “An a ene.” ⁵ Ci Lubaŋa owacce ni, “Pe inyik cok kany. Luny war woko ki i tyeni, pien kabedo ma icuŋ iye-ni noŋ maleŋ.” ⁶ Ka owacce ni, “An Lubaŋa pa woru Lubaŋa pa Abraim, Lubaŋa pa Icaka ki Lubaŋa pa Yakobo.” Moses okano waŋe woko, pien onoŋo lworo neno Lubaŋa. ⁷ Rwot dok owacci, “Doŋ atyeko neno atwom pa jona i Ejipt, ka dok awinyo kokogi i kom ludito ma loyo ticgi. ⁸ Ci doŋ alor piny ka larogi ki iciŋ jo Ejipt, ki kwanyogi woko ki i lobo meno, wek akelgi i lobo maber, malac, lobo ma mol cak ki moo kic, i kabedo pa jo Kanaan, jo Kit, jo Amor, jo Periji, jo Kiv ki jo Jebuc. ⁹ Ci nen, koko pa jo Icrael doŋ owinnye wa bota, dok aneno kit uno ma jo Ejipt giunogi kwede. ¹⁰ Bin, abicwali bot Parao wek ikwany jona, likwayo pa Icrael, ki i Ejipt.” ¹¹ Ento Moses owaco bot Lubaŋa ni, “An aŋa ma aromo cito bot Parao, ki kwanyo likwayo pa Icrael woko ki i Ejipt?” ¹² Lubaŋa ogamo ni, “Ento an aye abibedo kwedi; man aye bibedo lanyut boti, ma nyuto ni an aye acwali: ka doŋ ityeko kwanyo jona woko ki i Ejipt, ci wubiworo Lubaŋa i kom got man.” ¹³ Moses owaco bot Lubaŋa ni, “Ka acito bot jo Icrael, awaco botgi ni, ‘Lubaŋa pa kwarowu ocwala botwu,’ ce ka gupenya ni, ‘Nyiŋe aŋa?’ ci abiwaco botgi nio?” ¹⁴ Ci Lubaŋa owaco ki Moses ni, “ATYE MA ATYE.” Ka dok owacci, “Wac lok man bot jo Icrael ni, ‘ATYE aye ocwala botwu.’ ”ATYE…Man aye nyiŋa matwal

¹ Rwot owaco bot Moses ni, “Nen aketi macalo Lubaŋa bot Parao, ki omeru Aron bibedo lanebini. ² In ibiloko lok ducu ma aciko boti; ci omeru Aron bitito bot Parao pi weko jo Icrael gua woko ki i lobone. ³ Ento abijiŋo cwiny Parao doko nwaŋ, abimedo lwak lanyut ki taŋo i lobo Ejipt. ⁴ Parao pe biwinyo lokki; abiketo ciŋa i kom Ejipt, ci abikwanyo monnya, jona, ma gin aye likwayo pa Icrael, ki i Ejipt, pi kop madito ma abiŋolo i wiye. ⁵ Jo Ejipt gibiŋeyo ni an a Rwot, ka abiryeyo ciŋa i kom lobo Ejipt pi kwanyo jo Icrael woko ki i kingi.”

Kombeddi dong, wek ngat mo odok cen i lok man ki lebgi, calo iwacci gitye ka tito bot lareme ma peya owinyo. Wek wakony gi ka guweko gin mo keken onyo gu medo gin mo kiken ma pi ki ngeyo. Ka meno otimme watwero penyo ni, “Inongo lok meno kwene i lok meno?”

Lok man pwonyowa gin ango i kom Lubanga, kite, ki gin ma en timo?

Gin ango ma wapwonyo i kom dano, kadiwa wan kikomwa, ki i lok man?

Ibitiyo lok ada pa Lubanga ma tye i lok man i kwoni nining i cabit man? Gin ango ma ibi timone?

Nga ma ibi nywako lok ada ki i lok man bote ma peya wa rwate? Tika ingeyo jo mukene ma bene gimito niang lok pa Lubanga i app man calo wan?

Kit ma cokkewa cok gik-ki, kong dong wamok awene ma wabirwatte iye doki ki dok anga ma bidoro cokkewa ma lubo.

Wa cuko cwinyi me coyo piny gin ma iwaco ni ibi timo, ki me dok kwano lok man i nino ma peya wa rwate. Lapwony twero poko lok ma ki coyo onyo dwan ka ngat mo pe kwede. Ka watye ka wot, wek wakwa Rwot wek okonywa.