Cik apar ki Gitum

Malube ki ngo ma otimme i komi nicake i kare ma okato ma wa rwate, gin ango ma itye ki pwoc pire?

Gin ango ma okelo par i cwinyi i cabit man, dok ngo ma imito wek jami obed maber?

Gin ango ma dano ma i kabedowu mito, dok waromo konyo ngat acel acel nining me cobo peko ma wanyuto ni?

Lok ango ma obedo i kare ma okato ma wa rwate? Gin ango ma wapwonyo i kom Lubanga ki dano?

I cokkewa mukato angec, in imoko tammi me keto gin ma ipwonyo i tic. Gin ango ma itimo, dok otimme nining?

Anga ma inywako kwede gin mo ki i lok ma okato ni? Gin gudok iye nining?

Wanongo jami mapol ma mite i kare ma okato ma wa rwate ki wa yubu me cobo jami ma mite ni. Otimo nining?

Kombeddi dong, wek wakwan lok me tin ki bot Lubanga...

¹ Lubaŋa oloko lok man ducu kun waco ni, ² “An a Rwot Lubaŋani, ma yam akwanyi woko ki i lobo Ejipt, i ot me opii. ³ “Pe ibed ki lubaŋa mukene kono an kena. ⁴ “Pe iti cal apayani mo, nyo cal gin ma tye malo i polo, nyo ma tye piny i wi lobo, nyo gin ma tye i pii ma i te lobo. ⁵ Pe iryebbe piny i nyimgi, pe iworgi; pien an aye a Rwot Lubaŋani, an Lubaŋa ma lanyeko. Aketo can i kom likwayo pi bal pa kwarogi nio wa i yalwak me adek ki me aŋwen pa jo ma gikwera, ⁶ ento abinyuto mar ma pe lokke i kom jo alip ki alip ma gimara, ma gimako cikka. ⁷ “Pe ilwoŋ nyiŋ Rwot Lubaŋani me noŋo; pien Rwot bimiyo kop loyo dano ma lwoŋo nyiŋe me noŋo. ⁸ “Po pi nino me cabit, ikwer obed maleŋ. ⁹ Ibitic matek nino abicel, kun itiyo iye ticci ducu; ¹⁰ ento nino me abirone en aye cabit pa Rwot Lubaŋani. I nino meno pe igud iye tic mo, in kikomi, nyo wodi, nyo nyari, kadi opiini, kadi aŋecani, kadi dyaŋŋi, kadi labedo ma bedo i kinwu; ¹¹ pien i nino abicel aye Rwot yam otiyo iye polo ki nam ki jami ducu ma tye iye, ci oywe i kom nino me abiro; mumiyo Rwot omiyo gum i kom nino me abiro, olonyo obedo maleŋ. ¹² “Wor woru ki meni, wek iri pi kare malac i lobo ma Rwot Lubaŋani bimiyo boti. ¹³ “Pe ineki. ¹⁴ “Pe itim abor. ¹⁵ “Pe ikwal gin mo. ¹⁶ “Pe ibed caden me goba i kom lawoti. ¹⁷ “Cwinyi pe opukke i kom ot pa lawoti; cwinyi pe opukke i kom dako pa lawoti, kadi opiine nyo aŋecane, nyo twonne, nyo kanane, nyo kadi gin mo ma lawoti tye kwede.”

¹ Rwot owaco bot Moses ni, ² “Dano twero balo kun oturo cik pa Rwot, macalo ka obwolo lawote i kom gin ma con okano bote, nyo ojeŋo bote, nyo ka omayo jamine, nyo oburo lawote, ³ nyo onoŋo gin ma orwenyo ci oloko iye lok goba, kun okwoŋo iye kwoŋ me goba; nyo otimo gin mo acel i kom gin ducu ma dano gitimo ci gibalo kwede. ⁴ Ka ŋat mo obalo kumeno ce otiŋo alii, en bidwoko waŋ gin ma omayo-ni, nyo gin ma en otero me bura, nyo gin ma onoŋo gikano: bote, nyo gin ma orwenyo ma en onoŋo, ⁵ nyo gin mo-ni ma en okwoŋo iye kwoŋ me goba. Bidwoko ducu ki berre, dok bimedo acel me abic i kome, ci miyo bot won jami i nino ma en tyero iye gitumme me tiŋo alii. ⁶ En bikelo gitumme me tiŋo alii bot Rwot, nyok ma kome pe ki mwonyo ma okwanyo ki i kin romi, i wel ma iŋolo, wek obed gitum me tiŋo alii; bikelo bot ajwaka. ⁷ Ajwaka bitimo gin lakwany bal ki i kome i nyim Rwot, ci Rwot biweko balle i kom gin mo-ni i kom gin ducu ma dano twero tiyo ma miyo etiŋo alii.”

Kombeddi dong, wek ngat mo odok cen i lok man ki lebgi, calo iwacci gitye ka tito bot lareme ma peya owinyo. Wek wakony gi ka guweko gin mo keken onyo gu medo gin mo kiken ma pi ki ngeyo. Ka meno otimme watwero penyo ni, “Inongo lok meno kwene i lok meno?”

Lok man pwonyowa gin ango i kom Lubanga, kite, ki gin ma en timo?

Gin ango ma wapwonyo i kom dano, kadiwa wan kikomwa, ki i lok man?

Ibitiyo lok ada pa Lubanga ma tye i lok man i kwoni nining i cabit man? Gin ango ma ibi timone?

Nga ma ibi nywako lok ada ki i lok man bote ma peya wa rwate? Tika ingeyo jo mukene ma bene gimito niang lok pa Lubanga i app man calo wan?

Kit ma cokkewa cok gik-ki, kong dong wamok awene ma wabirwatte iye doki ki dok anga ma bidoro cokkewa ma lubo.

Wa cuko cwinyi me coyo piny gin ma iwaco ni ibi timo, ki me dok kwano lok man i nino ma peya wa rwate. Lapwony twero poko lok ma ki coyo onyo dwan ka ngat mo pe kwede. Ka watye ka wot, wek wakwa Rwot wek okonywa.