بانگکردنی خودا بۆ موسا

1 بە گوێرەی ئەوەی کەی لەوەتەی دوا جار یەکترمان بینیوە چی بەسەرتدا هاتووە ، ئەو شتە چییە کە بۆی سوپاسگوزاریت؟

2 ئەم هەفتەیە چی فشاری خستووەتە سەرت، و پێویستت بە چییە بۆ ئەوەی دۆخەکە باشتر بێت؟

3 پێداویستییەکانی خەڵکی کۆمەڵگاکەت چین، و چۆن دەتوانین یارمەتی یەکتر بدەین بۆ پڕکردنەوەی ئەو پێداویستییانەی کە باسمان کردوون؟

4 دوا جار کە یەکترمان بینی چیرۆکەکە چی بوو؟ دەربارەی خودا و خەڵک چی فێربووین؟

5 لە کۆتا كۆبوونەوەماندا، بڕیارت دا ئەوەی فێری بوویت جێبەجێی بکەیت. چیت کرد، و چۆن بوو؟

6 لە چیرۆکی ڕابردوودا چی شتێکت لەگەڵ کێ بەش کرد؟ وەڵامیان چۆن بوو؟

7 کۆتا جار کە یەکترمان بینی چەند پێداویستییەکمان دیاری کرد و پلانمان دانا بۆ پڕکردنەوەیپێداویستییەکان. چۆن بەڕێوەچوو؟

8 ئێستا، با چیرۆکی ئەمڕۆ لە خوداوە بخوێنینەوە...

²³ ئەوە بوو لەو ماوە درێژە، پاشای میسر مرد. نەوەی ئیسرائیلیش ئاهیان هەڵکێشا لە دەست کۆیلایەتی و هاواریان کرد بۆ یارمەتی، گریانەکەیان بەهۆی کۆیلایەتییەوە بۆ خودا بەرزبووەوە. ²⁴ خوداش گوێی لە ناڵەیان بوو و پەیمانەکەی خۆی لەیاد بوو لەگەڵ ئیبراهیم و ئیسحاق و یاقوب. ²⁵ ئیتر خودا ڕوانییە نەوەی ئیسرائیل و بایەخی پێدان. ¹ موسا بووە شوانی مەڕەکانی یەترۆی خەزووری، کە کاهینی میدیان بوو. مەڕەکانی بردە ئەوپەڕی دەشتودەرەکە هەتا گەیشتە کێوی خودا، حۆرێڤ. ² لەوێ لەناو گڕی ئاگرێک لە دەوەنێک فریشتەی یەزدانی بۆ دەرکەوت. کە موسا تەماشای کرد بینی وا دەوەنەکە گڕی گرتووە، کەچی ناسووتێت. ³ موسا گوتی: «لادەدەم و تەماشای ئەو دیمەنە مەزنە دەکەم. بۆچی دەوەنەکە ناسووتێت؟» ⁴ کاتێک یەزدان بینی کە موسا لایدا بۆ ئەوەی تەماشا بکات، خودا لەناو دەوەنەکەوە بانگی کرد و فەرمووی: «موسا. موسا.» ئەویش گوتی: «ئەوەتام.» ⁵ فەرمووی: «نزیکی ئێرە مەکەوە. پێڵاوەکانت لە پێت دابکەنە، چونکە ئەو شوێنەی تۆ لەسەری وەستاویت خاکێکی پیرۆزە.» ⁶ ئینجا فەرمووی: «من خودای باوکتم، خودای ئیبراهیم و خودای ئیسحاق و خودای یاقوبم.» موسا ڕووی خۆی داپۆشی، چونکە دەترسا تەماشای خودا بکات. ⁷ یەزدان فەرمووی: «بەڕاستی من زەلیلی گەلەکەمم لە میسر بینی، هەروەها گوێم لە هاواریان بوو لەبەر سەرکارەکانیان، چونکە بە ئازارەکانیانم زانی. ⁸ ئەوا هاتمە خوارەوە بۆ ئەوەی فریایان بکەوم لە دەست میسرییەکان و لەو خاکەوە بیانبەم بۆ خاکێکی باش و فراوان، بۆ خاکێک شیر و هەنگوینی لێ دەڕژێت، بۆ شوێنی کەنعانی، حیتی، ئەمۆری، پریزی، حیڤی و یەبوسییەکان. ⁹ ئێستا هاواری نەوەی ئیسرائیل گەیشتە لام و هەروەها ئەو چەوسانەوەیەم بینی کە بە دەست میسرییەکان دەیچێژن. ¹⁰ ئێستاش بڕۆ و دەتنێرم بۆ لای فیرعەون و گەلەکەی خۆم، نەوەی ئیسرائیل لە میسر بهێنە دەرەوە.» ¹¹ بەڵام موسا بە خودای گوت: «من کێم هەتا بچمە لای فیرعەون و نەوەی ئیسرائیل لە میسر بهێنمە دەرەوە؟» ¹² ئەویش فەرمووی: «من لەگەڵت دەبم، ئەمەش دەبێتە نیشانە بۆت کە من تۆم ناردووە، کاتێک گەل لە میسرەوە دەردەهێنیت، ئێوە لەسەر ئەم کێوە خودا دەپەرستن.» ¹³ موساش بە خودای گوت: «من وا دەچمە لای نەوەی ئیسرائیل و پێیان دەڵێم ”خودای باپیرانتان منی بۆ ئێوە ناردووە.“ ئەگەر پێم بڵێن: ”ناوی چییە،“ بڵێم چی؟» ¹⁴ خوداش بە موسای فەرموو: «من هەم ئەوەی کە هەم.» هەروەها فەرمووی: «ئاوا بە نەوەی ئیسرائیل دەڵێیت: ” ’هەم‘ منی بۆ ئێوە ناردووە.“»

¹ یەزدان بە موسای فەرموو: «بڕوانە، تۆم وەک خودای فیرعەون لێکردووە و هارونی براشت وەک پێغەمبەری تۆ دەبێت. ² تۆ دەدوێیت بە هەموو ئەوەی فەرمانت پێ دەکەم، هارونی براشت لەگەڵ فیرعەون دەدوێت بۆ ئەوەی ڕێگا بە نەوەی ئیسرائیل بدات خاکەکەی بەجێبهێڵن. ³ بەڵام من دڵی فیرعەون ڕەق دەکەم و نیشانە و پەرجووەکانم زیاتر دەکەم لە خاکی میسر. ⁴ فیرعەون گوێتان لێ ناگرێت، منیش دەستم دەخەمە سەر میسر، لەشکرەکانیشم کە نەوەی ئیسرائیلی گەلەکەمن بە چەند حوکمێکی دادپەروەرانەی مەزن لە خاکی میسر دەردەهێنم. ⁵ ئیتر میسرییەکانیش دەزانن کە من یەزدانم، کاتێک دەست بۆ میسر درێژ دەکەم و نەوەی ئیسرائیل لەنێویان دەردەهێنم.»

1 ئێستا، با کەسێک ئەم بەشە بە وشەکانی خۆی بگێڕێتەوە، وەک ئەوەی بۆ هاوڕێیەک باسی بکات کە پێشتر هەرگیز نەیبیستبێت. با یارمەتییان بدەین ئەگەر شتێکیان بیرچوو یان بە هەڵە شتێکیان زیاد کرد. ئەگەر ئەوە ڕوویدا دەتوانین بپرسین، "لە کوێی چیرۆکەکەدا ئەوەت دۆزیەوە؟"

2 ئەم چیرۆکە چی فێری ئێمە دەکات دەربارەی خودا، کەسایەتییەکەی و ئەوەی کە دەیکات؟

3 لەم چیرۆکەوە چی فێر دەبین دەربارەی خەڵک، بە خۆمانیشەوە؟

4 لەم هەفتەیەدا چۆن ڕاستی خودا لەم چیرۆکەوە لە ژیانتدا جێبەجێ دەکەیت؟ ئەو کردارە یان شتە دیاریکراوە چییە کە ئەنجامی دەدەیت؟

5 پێش ئەوەی جارێکی تر یەکتر ببینینەوە، ڕاستییەک لەم چیرۆکە لەگەڵ کێ بەش دەکەیت؟ ئایا کەسانی تر دەناسیت کە حەز بکەن وەک ئێمە وشەی خودا لەم ئەپەدا بدۆزنەوە؟

6 کە کۆبوونەوەکەمان بەرەو کۆتایی دەچێت، با بڕیار بدەین کەی جارێکی تر یەکتر دەبینینەوە و کێ ئاسانکاری بۆ کۆبوونەوەی داهاتوومان دەکات.

7 هانتان دەدەین بۆ تێبینی وەرگرن بۆ ئەوەی کە گوتتان دەیکەن، و لەو ڕۆژانەی پێش ئەوەی جارێکی دیکە یەکتر دەبینینەوە، ئەم چیرۆکە بخوێننەوە. ئاسانکارەکە دەتوانێت دەق یان دەنگی چیرۆکەکە بڵاوبکاتەوە ئەگەر هەرکەسێک نییەتی. لەکاتی ڕۆیشتنماندا، با داوا لە پەروەردگار بکەین یارمەتیمان بدات.