Lxelq

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

Tura, eyyaw a nɣer teqṣiḍt n wass-a sɣur Ṛebbi...

¹ Di tazwara Illu yexleq igenwan d lqaɛa. ² Lqaɛa tella texla d tilemt ; tillas ɣumment maylellif, Ṛṛuḥ n Yillu itezzi sufella n waman. ³ Illu yenna : Ad tili tafat ! Dɣa tella-d tafat. ⁴ Iwala Yillu tafat telha, dɣa yefṛeq tafat d tillas. ⁵ Illu isemma i tafat : Ass, isemma i tillas : Iḍ. Tella-d tmeddit, tella-d tafrara : D ass amezwaru. ⁶ Illu yenna : Ad yili littseɛ gar waman, ad yefṛeq gar waman d waman. ⁷ Ihi yexdem Yillu littseɛ-agi, yefṛeq gar waman yellan ddaw littseɛ-nni d waman yellan nnig-s. Akka i teḍra. ⁸ Illu isemma i littseɛ-nni : Igenni. Tella-d tmeddit, tella-d tafrara : D ass wis sin. ⁹ Illu yenna : Ad nnejmaɛen waman yellan ddaw n igenni ɣer yiwen wemkan, ad d-ibin wayen yekkawen. Akka i teḍra. ¹⁰ Illu isemma i wayen yekkawen lqaɛa, ma d igillem n waman isemma-yas : Ilel ; iwala Yillu ayenni yelha. ¹¹ Imiren yenna Yillu : Ad tessu lqaɛa s tizegzewt, s leḥcic yesɛan zzerriɛa, s ttjuṛ n lfakya i d-ittaken yal ta ṣṣenf-is n lfakya di lqaɛa, yal lfakya s zzerriɛa-ines. Akka i teḍra. ¹² Tefka-d lqaɛa tizegzewt, leḥcic yesɛa zzerriɛa yal yiwet s ṣṣenf-is, ttjuṛ fkant-d lfakya yal ṣṣenf s zzerriɛa-ines. Illu iwala ayenni yelha. ¹³ Tella-d tmeddit, tella-d tafrara : D ass wis tlata. ¹⁴ Illu yenna : Ad ilint teftilin di littseɛ n igenni, i wakken ad bḍunt gar wass d yiḍ, ad ilint d licaṛat s wacu ara ttwaɛqalen lewqat, ussan akked iseggasen. ¹⁵ Ad ilint d tiftilin di littseɛ n igenni, ara yefken tafat i lqaɛa ; akka i teḍra. ¹⁶ Ixdem-d Yillu snat n teftilin timeqqranin, tameqqrant akken ad teḥkem ɣef wass, tameẓyant akken ad teḥkem ɣef yiḍ, yerna-d itran. ¹⁷ Issers-iten Yillu di littseɛ n igenni ad fken tafat i lqaɛa, ¹⁸ Ad ḥekmen ɣef wass d yiḍ, yernu ad bḍun gar tafat d tillas. Illu iwala ayenni yelha. ¹⁹ Tella-d tmeddit, tella-d tafrara, d ass wis ṛebɛa. ²⁰ Illu yenna : Ad ttgemgumen waman s umrured n iɣersiwen yeddren, ad ttferfiren yegḍaḍ di littseɛ n igenni, sennig lqaɛa. ²¹ Ixleq Yillu yal ccetla n lewḥuc imeqqranen n yilel d wayen akk yeddren yettɛummun, s wayes ttgemgumen waman ; akked yal agḍiḍ bu wafriwen yal wa s ccetla-s. Illu iwala ayenni yelha, ²² iburek-iten yenna : Arwet, ftit teččaṛem aman n ilellen ; ad ftin daɣen yigḍaḍ di lqaɛa. ²³ Tella-d tmeddit, tella-d tafrara : D ass wis xemsa. ²⁴ Illu yenna : Ad d-tefk lqaɛa iɣersiwen yeddren yal yiwen s ccetla-s, wid ileḥḥun ɣef uɛebbuḍ, lmal, iɣersiwen n lexla, yal wa s ccetla-s. Akka i teḍra. ²⁵ Illu yefka-d iɣersiwen n lqaɛa yal wa s ccetla-s, lmal yal wa s ccetla-s, d wayen akk ileḥḥun ɣef uɛebbuḍ yal wa s ccetla-s. Illu iwala ayenni yelha.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.