Lxelq n Yemdanen

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

²⁶ Illu yenna : Ad d-nexleq amdan ɣer ṣṣifa-nneɣ, ɣer ccbiha-nneɣ, ad iḥkem ɣef iselman n yilel, ɣef yigḍaḍ n igenni, ɣef lmal, ɣef lqaɛa meṛṛa, d wayen akk ileḥḥun ɣef uɛebbuḍ di lqaɛa. ²⁷ Ixleq Yillu amdan ɣer ṣṣifa-ines : Ixleq-it ɣer ṣṣifa n Yillu, ixleq-iten d argaz d tameṭṭut.

⁷ Illu Ameɣlal, imsel-d amdan seg wakal n lqaɛa, isuḍ deg wanzaren-is nnefs n tudert, dɣa yuɣal wemdan d taṛwiḥt yeddren. ⁸ Syenna, Illu Ameɣlal yeẓẓa yiwet n tebḥirt di Ɛaden, ɣer tama n usamar, yessers deg-s amdan-nni i yemsel. ⁹ Issemɣi-d seg wakal yal ṣṣenf n ttjuṛ icebḥen i tmuɣli, yelhan i wučči, yerna-d ttejṛa n tudert di tlemmast n tebḥirt, akked ttejṛa n tmusni n lxir akked cceṛ.

¹⁵ Illu Ameɣlal yeddem amdan, issers-it di tebḥirt n Ɛaden akken ad tt-ixdem yerna ad tt-iɛass. ¹⁶ Yefka-yas lameṛ-agi yenna-yas : Tzemreḍ ad teččeḍ si ttjuṛ akk n tebḥirt, ¹⁷ lameɛna ur tett ara si ttejṛa n tmusni n lxir akked cceṛ ; axaṭer ass ideg ara teččeḍ seg-s d lmut ara temmteḍ. ¹⁸ Illu Ameɣlal yenna : Ur yelhi ara i wemdan ad yili weḥd-s ; ad as-d-xedmeɣ amɛiwen ara yilin am netta. ¹⁹ Imsel-d Yillu iɣersiwen meṛṛa n teẓgi d yegḍaḍ akk n igenni seg wakal. Yewwi-ten-id i wemdan akken ad iẓer amek ara sen-isemmi, s wakka yal taṛwiḥt yeddren ad tesɛu isem ara as-yefk wemdan. ²⁰ Ifka wemdan ismawen i lmal meṛṛa, i yegḍaḍ n igenni d iɣersiwen akk n teẓgi ; lameɛna ur yufi yara i yiman-is amɛiwen ara yilin am netta. ²¹ Illu Ameɣlal issers-d naddam d ameqqran ɣef wemdan, yeddem-d yiwen seg ibeṛdiyen-is, imiren yergel amkan-nni s weksum. ²² Ibna-d Yillu yiwet n tmeṭṭut s ubeṛdi-nni i d-iddem seg umdan, iwwi-yas-tt-id. ²³ Dɣa yenna wemdan : Tikkelt-a, tagi d iɣes n yeɣsan-iw, d aksum n weksum-iw. Tagi ad tettusemmi tameṭṭut, axaṭer tettwaddem-d seg wergaz. ²⁴ Daymi, argaz ad yeǧǧ baba-s d yemma-s, ad yezdi d tmeṭṭut-is, ad uɣalen d yiwet n tfekka. ²⁵ Argaz d tmeṭṭut-is llan i sin d iɛeryanen, lameɛna yiwen ur isseḍḥa seg wayeḍ.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.