Imdanen Ɛuṣan Ṛebbi

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Yella wezrem d aḥili ugar akk n iɣersiwen n teẓgi i d-ixleq Yillu Ameɣlal. Yenna i tmeṭṭut : Ɛni s tidett yenna-d Yillu : Ur tettem ara si ttjuṛ akk n tebḥirt ? ² Tenna tmeṭṭut i wezrem : Ntett si lfakya n ttjuṛ n tebḥirt, ³ ma d lfakya n ttejṛa yellan di tlemmast n tebḥirt, Illu yenna : Ur tettem seg-s ur tt-tettnalem, neɣ ma ulac ad temmtem. ⁴ Dɣa yenna wezrem i tmeṭṭut : Ur tettmettatem ara. ⁵ Lameɛna yeẓra Yillu ass deg ara teččem seg-s, ad ldint wallen-nwen, ad tilim am iṛebbiten yessnen lxir d cceṛ. ⁶ Twala tmeṭṭut ttejṛa-nni telha i wučči, tecbeḥ i tmuɣli, tezmer ad d-tefk ameyyez. Tekkes-d si lfakya-s tečča ; tefka daɣen seg-s i wergaz-is yellan yid-s, dɣa yečča. ⁷ Ldint wallen-nsen di sin, ukin d iɛeryanen i llan. Xedmen-d i yiman-nsen aggusen i d-zḍan s iferrawen n tenqeltt. ⁸ Dɣa slan i ṣṣut n Yillu Ameɣlal iteddun di tebḥirt lawan n uzuzwu. Argaz d tmeṭṭut-is ffren iman-nsen fell-as gar ttjuṛ n tebḥirt. ⁹ Illu Ameɣlal issawel i wergaz yenna-yas : Anida-k ? ¹⁰ Irra-yas : Sliɣ i ṣṣut-ik di tebḥirt dɣa uggadeɣ, axaṭer aql-iyi d aɛeryan, daymi i ffreɣ. ¹¹ Illu Ameɣlal yenna : Anwa i ak-yennan d aɛeryan i telliḍ ? Ɛni teččiḍ si ttejṛa-nni ɣef i ak-weṣṣaɣ ur ttetteḍ ara seg-s ? ¹² Yerra-yas wergaz : D tameṭṭut-nni i yi-d-tefkiḍ, d nettat i yi-d-yefkan si ttejṛa-nni, dɣa ččiɣ seg-s. ¹³ Imiren yenna Yillu Ameɣlal i tmeṭṭut : D acu i txedmeḍ akka ? Terra-yas tmeṭṭut : Iɣwa-yi wezrem, dɣa ččiɣ. ¹⁴ Illu yenna i wezrem : Imi i txedmeḍ akka, ad tettwaneɛleḍ gar lmal meṛṛa d iɣersiwen akk n teẓgi, ad tedduḍ ɣef uɛebbuḍ-ik yerna ad teččeḍ akal ussan akk n tudert-ik. ¹⁵ Ad rreɣ taɛdawit gar-ak d tmeṭṭut, gar ccetla-k d ccetla-s : Ccetla-s ad ak-temḥeq aqerruy-ik, kečč ad as-teqqseḍ awrez-is. ¹⁶ Yenna i tmeṭṭut : Ad ssugteɣ leqṛiḥ n tadisin-im, s leɛtab ara d-tesɛuḍ dderya. Ccehwat-inem ad milent ɣer wergaz-im, netta ad kkem-iḥkem. ¹⁷ Yenna i Adem : Imi i tessemḥesseḍ i tmeṭṭut-ik, teččiḍ si ttejṛa-nni ɣef i ak-weṣṣaɣ ur ttetteḍ ara seg-s, ad ittwanɛel wakal ɣef ddemma-k, s leɛtab ara d-tekkseḍ seg-s tamɛict-ik ussan akk n tudert-ik, ¹⁸ ad ak-d-ifk isennanen d inijjel, ad ttetteḍ leḥcic n wurtan. ¹⁹ S tidi n unyir-ik ara teččeḍ aɣṛum, alamma tuɣaleḍ ɣer wakal ansi i d-tettwakkseḍ, axaṭer seg wakal i d-tekkiḍ, ɣer wakal ara tuɣaleḍ. ²⁰ Isemma wergaz i tmeṭṭut-is Ḥewwa : Axaṭer d tayemmatt n imudduren meṛṛa. ²¹ Ixdem-d Yillu llebsa n uglim i Adem d tmeṭṭut-is, issels-iten. ²² Yenna-yasen : Atah tura yuɣal wemdan am yiwen seg-neɣ di tmusni n lxir d cceṛ. Tura ur ilaq ara daɣen ad yeẓẓel afus-is ɣer ttejṛa n tudert, lemmer ad yečč seg-s, ad yidir i dayem. ²³ Issufeɣ-it Yillu Ameɣlal si tebḥirt n Ɛaden, akken ad ixdem akal ansi i d-ittwakkes. ²⁴ Mi yessufeɣ amdan, isbedd ɣer usamar n tebḥirt n Ɛaden Ikaruben akked uḥeǧǧaǧu n ujenwi yettneqlaben i wakken ad ɛassen abrid ɣer ttejṛa n tudert.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.