Ṛebbi Issenger Imdanen Imcumen

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

⁵ Iwala Umeɣlal d akken cceṛ n wemdan meqqer di ddunit ; yal ass ul-is ittnawal anagar ixemmimen n diri. ⁶ Isḥassef Umeɣlal imi d-yefka amdan ɣer ddunit yerna yeḥzen deg ul-is.

⁹ Attah ccetla n Nuḥ : Yella Nuḥ d argaz aḥeqqi, d amekdi di zzman-is ; Nuḥ yedda deg ubrid n Yillu. ¹⁰ Isɛa-d Nuḥ tlata n warrac : Sam, Ḥam d Yafit. ¹¹ Ɣer Yillu, ddunit tella tefsed, teččuṛ d nncaf. ¹² Illu iwala ddunit tefsed, imi yal amdan issefsed tikli-ines di lqaɛa. ¹³ Dɣa yenna Yillu i Nuḥ : Qesdeɣ ad ssnegreɣ akk imdanen ; axaṭer ɣef ddemma-nsen, ddunit teččuṛ d lbaṭel ; ihi atan ad ten-snegreɣ s nutni s lqaɛa. ¹⁴ Xdem-d afniq i yiman-ik, s wesɣaṛ n sseṛwel, xdem-it d tixxamin, sleɣ-it s uselɣaɣ s beṛṛa s zdaxel. ¹⁵ Atah wamek ara t-txedmeḍ : Ad yesɛu 150 lmitrat di teɣzi, 25 lmitrat di tehri d 15 di leɛli. ¹⁶ Xdem i wefniq-nni yiwen useffaylu n uzgen lmitra seddaw n ssqef ; sbedd-as tawwurt deg idis ; wqem-as yiwen wannag ukessar, rnu-yas wis sin d wis tlata. ¹⁷ Ma d nekk ad d-ssiseɣ anfal n waman ɣef ddunit, akken ad ssnegreɣ kra yellan d tafekka yesɛan nnefs n tudert seddaw n igenni, ayen akk yellan ɣef lqaɛa ad yemmet. ¹⁸ Lameɛna ad sbeddeɣ tamsisit-iw yid-k ; ad tkecmeḍ ɣer wefniq kečč d warraw-ik, tameṭṭut-ik d teslatin-ik. ¹⁹ Ad teskecmeḍ daɣen ɣer wefniq tayuga si yal ṣṣenf n wayen akk yeddren, yesɛan tafekka, i wakken ad menɛen yid-k : Ad ilin d awtem d tewtemt. ²⁰ Ad d-tas ɣuṛ-k tyuga si yal ṣṣenf, igḍaḍ, iɣersiwen, iɣersiwen iteddun ɣef uɛebbuḍ di lqaɛa, i wakken ad menɛen si lmut. ²¹ Ma d kečč, ddem si tgella akk yettmaččan, xezzen-itt d aɛwin ɣuṛ-k, i wakken ad ak-tili d lqut i kečč d nutni. ²² D ayenni i yexdem Nuḥ. Ixdem kullec akken i as-t-id-yumeṛ Yillu.

¹⁷ Ikka unfal 40 wussan ɣef lqaɛa. Ulin-d waman refden afniq-nni, yuli sennig lqaɛa. ¹⁸ Ggten waman, ulin mliḥ sennig lqaɛa, dɣa iteddu ufniq-nni sufella n waman. ¹⁹ Simmal tteggten waman ɣef lqaɛa, idurar akk ɛlayen yellan ddaw n igenni meṛṛa ɣummen. ²⁰ Ɣummen waman idurar, kkan-d nnig-sen s sebɛa lmitrat di leɛli. ²¹ Yal tafekka yettemruruden di lqaɛa, temmut. Ama d igḍaḍ, d lmal neɣ d iɣersiwen, ayen akk yettemruruden di lqaɛa, akked yimdanen meṛṛa. ²² Ayen akk yettidiren ɣef lqaɛa, yesɛan nnefs n tudert, yemmut. ²³ Imḥa Yillu ayen akk yeddren ɣef udem n lqaɛa : Seg umdan alamma d iɣersiwen, iɣersiwen iteddun ɣef uɛebbuḍ akked yegḍaḍ n igenni, ttwakksen si ddunit. Yegra-d anagar Nuḥ d wid yellan yid-s deg ufniq. ²⁴ Yeqqim uḥemmal n waman ɣef lqaɛa azal n meyya uxemsin wussan.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.