1
2
3
4
5
6
7
8
¹ Mbeɛd tidyanin-agi, Illu ijeṛṛeb Ibrahim, yenna-yas : Ay Ibrahim ! Irra-yas : Aql-iyi ! ² Illu yenna : Ddem mmi-k Isḥaq, awḥid-ik, win i tḥemmleḍ ; ṛuḥ ɣer tmurt n Muriya, ɣer yiwen wedrar ara ak-sneɛteɣ, efk-it dinna d asfel n tseṛɣit. ³ Ikker Ibrahim ṣṣbeḥ zik, yerra tabarda i weɣyul-is, yewwi yid-s sin seg iqeddacen-is imeẓyanen akked mmi-s Isḥaq. Iqedder isɣaṛen i wesfel-nni, dɣa iṭṭef abrid ɣer wemkan-nni i as-d-inna Yillu. ⁴ Ass wis tlata, irfed Ibrahim allen-is, iwala amkan-nni si mebɛid. ⁵ Dɣa yenna i sin-nni yiqeddacen-is : Kunwi, qqimet dagi akked weɣyul-agi, ma d nekk akked weqcic-agi, ad nali iwsawen-ina akken ad neɛbed Illu, imiren ad d-nuɣal ɣuṛ-wen. ⁶ Iddem Ibrahim isɣaṛen-nni n wesfel ara yeṛɣen, isbabb-iten i mmi-s Isḥaq, iddem daɣen deg ufus-is asafu akked ujenwi. Dɣa ṛuḥen akken di sin. ⁷ Inṭeq Isḥaq ɣer baba-s Ibrahim yenna : A baba ! Irra-yas : D acu a mmi ! Yenna-yas Isḥaq : Atah usafu d yesɣaṛen ; lameɛna anda-t izimer i wesfel ? ⁸ Irra-yas Ibrahim : A mmi, Illu s yiman-is ad d-inub izimer i wesfel n tseṛɣit. Dɣa ṛuḥen akken di sin. ⁹ Mi wwḍen ɣer wemkan-nni i as-d-issenɛet Yillu, ibna dinna Ibrahim yiwen udebder, issers fell-as isɣaṛen-nni. Yurez mmi-s Isḥaq dɣa issers-it ɣef udebder-nni, sufella n yesɣaṛen. ¹⁰ Imiren iẓẓel Ibrahim afus-is, iddem-d ajenwi i wakken ad izlu mmi-s. ¹¹ Lameɛna iluɛa-t-id lmelk n Umeɣlal seg igenni, yenna : Ay Ibrahim ! Ay Ibrahim ! Irra-yas : Aql-iyi ! ¹² Yenna lmelk-nni : Ur tteẓẓel ara afus-ik ɣef weqcic, ɣuṛ-k ad as-txedmeḍ kra ! Axaṭer tura ẓriɣ tettaggadeḍ Illu, imi ur iyi-tugiḍ ara mmi-k, awḥid-ik. ¹³ Irfed Ibrahim allen-is, iwala yiwen ikerri deffir-s, ḥeṣlen wacciwen-is deg yiwen umadaɣ ; dɣa iṛuḥ Ibrahim iddem-d ikerri-nni, yefka-t d asfel n tseṛɣit deg wemkan n mmi-s. ¹⁴ Isemma Ibrahim i wemkan-nni “Ameɣlal ad d-inub”. Daymi i qqaren ar ass-a : Deg wedrar, Ameɣlal ad d-inub. ¹⁵ Issawel lmelk n Umeɣlal i Ibrahim tikkelt tis snat seg igenni ¹⁶ dɣa yenna : Ggulleɣ s yixf-iw, i d-inna Umeɣlal, imi i txedmeḍ ayagi, yerna ur iyi-tugiḍ ara mmi-k, awḥid-ik, ¹⁷ ar ad ak-sseṛwuɣ s lbarakat, ad sseftiɣ tadfert-ik am yitran n igenni, am ijdi yellan ɣef yiri n yilel. Ad teṭṭef tadfert-ik timdinin n yeɛdawen-is. ¹⁸ Leǧnas akk n ddunit ad ttubarken s tedfert-ik, axaṭer tuɣeḍ awal-iw. ¹⁹ Yuɣal Ibrahim ɣer iqeddacen-is, syenna ṭṭfen abrid, dduklen ɣer Bircibaɛ anda i yezdeɣ Ibrahim.
Bible en kabyle © Alliance biblique universelle, 2024. Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.
1
2
3
4
5
6
7
0:00
0:00