Ɛecṛa n Iewṣayat d Wesfel

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Imiren yenna-d Yillu imeslayen-agi meṛṛa : ² D nekk i d Ameɣlal Illu-yik, i ak-id-issufɣen seg tmurt n Maṣer, seg uxxam n tkelwa. ³ Ur tseɛɛuḍ ara illuyen nniḍen anagar nekk. ⁴ Ur d-tmessleḍ asebdad i yiman-ik, ur d-txeddmeḍ taɛencuṛt ara yesɛun tugna n wayen yellan iwsawen deg yigenni, neɣ ukessar di lqaɛa d wayen yellan deg waman ddaw n lqaɛa. ⁵ Ur tkennuḍ ara zdat-sen yerna ur ten-tɛebbdeḍ ara, axaṭer d nekk i d Ameɣlal Illu-inek, d Illu yettasmen, ttɛaqabeɣ dderya ɣef ddnub n ibabaten, alamma d tasuta tis tlata akked tis ṛebɛa n wid i yi-keṛhen. ⁶ Meɛna ttbeggineɣ-d ṛṛeḥma-w alamma d alef n tsutiwin i wid i yi-ḥemmlen yerna ḥerzen lewṣayat-iw. ⁷ Ur d-tettaddreḍ ara isem n Umeɣlal Illu-inek di lbaṭel, axaṭer Ameɣlal yettɛaqab win issexdamen isem-is di lbaṭel. ⁸ Ttmekti-d ass n usteɛfu i wakken ad t-tɛezleḍ. ⁹ Ad txedmeḍ setta wussan yerna ad tekfuḍ meṛṛa lecɣal-ik. ¹⁰ Lameɛna ass wis sebɛa, ad yili d ass n usteɛfu yettwaɛezlen i Umeɣlal Illu-inek : Ur txeddmeḍ ula d yiwen ccɣel, ama d kečč, ama d mmi-k neɣ d yelli-k, ama d aqeddac-ik neɣ taqeddact-ik, ama d lmal-inek neɣ d abeṛṛani izedɣen di tmurt-ik. ¹¹ Axaṭer deg setta wussan, ixleq-d Umeɣlal igenni, lqaɛa, ilel d wayen akk yellan deg-sen, imiren isteɛfa deg wass wis sebɛa ; daymi i iburek Umeɣlal ass n usteɛfu yerna iɛzel-it. ¹² Qadeṛ baba-k akked yemma-k i wakken ad yiɣzif leɛmeṛ-ik deg tmurt ara ak-yefk Umeɣlal Illu-yik. ¹³ Ur tneqqeḍ ara timegṛeṭ. ¹⁴ Ur zennu ara. ¹⁵ Ur ttaker ara. ¹⁶ Ur cehhed ara s ẓẓur mgal lɣiṛ-ik. ¹⁷ Ur ṭṭamaɛ acemma n wayen yellan d ayla n lɣiṛ-ik, ama d axxam-is ama d tameṭṭut-is neɣ d aqeddac-is, neɣ taqeddact-is, ama d azger-is neɣ d aɣyul-is.

¹ Yemmeslay Umeɣlal i Musa, yenna-yas : ² Weṣṣi Harun d warraw-is, ini-yasen : Atah lameṛ yeɛnan asfel n tseṛɣit : Ad yeqqim wesfel n tseṛɣit ɣef yirij sufella n udebder iḍ kamel armi d ṣṣbeḥ, yerna times n udebder ad treqq fell-as. ³ Ad yels umesfel aqenduṛ-is n lfina akked tserwula n lfina ɣef tfekka-s ; ad d-ikkes iɣiɣden-nni n tmes yeččan asfel-nni n tseṛɣit ɣef udebder, ad ten-issers tama n udebder. ⁴ Imiren ad ikkes iceṭṭiḍen-is, ad yels wiyaḍ akken ad yessufeɣ iɣiɣden-nni ɣer beṛṛa n wegrur, ɣer umkan zeddigen. ⁵ Ma d times-nni ɣef udebder, ad teqqim tecɛel, ur txessi ara ; yal ṣṣbeḥ ad as-yeggar umesfel isɣaṛen, ad issers fell-as asfel n tseṛɣit, ad yernu ad isseṛɣ fell-as tassemt n yiseflawen n talwit. ⁶ Ad treqq tmes i dayem ɣef udebder, ur txessi ara. ⁷ Atah lameṛ yeɛnan lweɛda. D arraw n Harun ara tt-yefken zdat n Umeɣlal, tama n udebder.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.