Aneɛtab n Uqeddac n Ṛebbi

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹³ Ameɣlal yenna : Aqeddac-iw ad yerbeḥ, ad iɛelli, ad ittwaɛuzz, ad yesɛu aṭas n ccan. ¹⁴ Akken i xelɛen s yis waṭas seg wakken i yexseṛ wudem-is, seg wakken i tbeddel ṣṣura-s amzun mačči d tin n wemdan, ¹⁵ akken daɣen ara dehcen waṭas n yigduden ɣef ddemma-s, igelliden ad ssusmen zdat-s, axaṭer mačči d ayen i sen-d-ḥkan ara walin, mačči d ayen i slan ara ẓren.

¹ Anwa i yumnen s wayen i aɣ-d-ittuxebbṛen ? Anwa i iɛeqllen tazmert n Umeɣlal ? ² Yegma zdat n Umeɣlal am uxalaf, am yisegmi i d-yeffɣen seg wakal yeqquren ; ur yesɛi ṣṣifa neɣ zzin i wakken ad nmuqel ɣuṛ-s, ur yelli di ṣṣura-s wayen i ijebbden tamuɣli. ³ Ittwaḥqeṛ, ḥazen-t yimdanen, yeṛwa leɛtab, yennum lḥif, yella am win iɣef ttezzin medden udmawen-nsen, neḥqeṛ-it, ur sen-nefki ara azal. ⁴ Ladɣa, d leɛtab-nneɣ i yewwi, d lehlakat-nneɣ i iɛebba ; nekni nenwa d Illu i t-iɛuqben, i t-d-iwwten, i t-isdullen. ⁵ Meɛna yettwajreḥ ɣef ddemma n ddnubat-nneɣ, yettwaqehheṛ ɣef ddemma n yizgalen-nneɣ, yeɣli-d fell-as lɛiqab, i wakken ad naf nekni talwit, s lejruḥ-is i neḥla. ⁶ Nella meṛṛa am wulli iḍaɛen, yal yiwen yetbeɛ abrid-is ; dɣa Ameɣlal yesseɣli-d fell-as ddnubat-nneɣ meṛṛa. ⁷ Yettwaḍlem, yendell, yerna ur d-yeldi ara imi-s, yecba izimer i wwin ɣer tmezliwt, neɣ tixsi yeggugmen zdat n wid i tt-ittelsen, ur d-yeldi ara imi-s. ⁸ Ṭṭfen-t, ḥekmen fell-as s lbaṭel, nɣan-t ; anwa di tsuta-s i yenneẓman imi i yettwakkes si ddunit, imi yettwet ɣef ddemma n ddnubat n wegdud-iw ? ⁹ Ssersen aẓekka-s gar yimcumen, meḍlen-t akked imeṛkantiyen, ɣas akken ur yexdim lbaṭel, ur d-iffiɣ wayen n diri seg yimi-s. ¹⁰ Lameɛna d Ameɣlal i yebɣan ad t-imḥeq s leɛtab. Ɣas akken yefka-t d asfel n ddnub, ad yesɛu dderya, ad iɣzifen wussan-is yerna ad yexdem akken ilaq lebɣi n Umeɣlal. ¹¹ Ameɣlal yenna : Ɣef ddemma n lḥif i tesɛedda teṛwiḥt-is, ad iwali tafat, ad yeččaṛ s lfeṛḥ ; aqeddac-iw, uɣdim n tidett, ad yerr aṭas n yimdanen d iḥeqqiyen, axaṭer iɛebba ddnubat-nsen. ¹² Ɣef wayagi ara as-fkeɣ amur gar yimeqqranen ; ad yebḍu lerbaḥ akked lefḥul, axaṭer yefka taṛwiḥt-is i lmut, yeqbel ad yettuneḥsab gar yimɛaṣiyen, ibubb ddnubat n waṭas n yimdanen, yerna icufeɛ-d imednuben.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.