Amsellek yettwaɛuhden

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Agdud yellan ileḥḥu di ṭṭlam iwala tafat tameqqrant. Wid i izedɣen deg tmurt n tili n lmut, tfeǧǧeǧ-d fell-asen tafat. ² Ay Ameɣlal, tesfuktiḍ agdud, tesnernaḍ lfeṛḥ-nsen ; feṛḥen zdat-k akken i feṛṛḥen deg lawan n tmegra, neɣ mi ara feṛqen lerbaḥ i d-ḥewṣen. ³ Azaglu-nni i ɛebban, aɛekkaz-nni i ten-yekkaten ɣer uɛrur akked udebbuz-nni i ten-ittqehhiṛen, terẓiḍ-ten am wass n tiṛẓi n Midyan. ⁴ Kra usebbaḍ yesderdzen di lqaɛa, kra ubalṭun yexnunsen deg idammen, ad ṛɣen, ad ten-tečč tmes. ⁵ Axaṭer ilul-aɣ-d weqcic, yettunefk-aɣ-d umemmit. Tissas n tgeldit ɣef tayett-is ; ad yettusemmi Amendaṛ yesteɛǧiben, Illu Anezmar, Ababat n dayem, Agellid n talwit. ⁶ Ad issewseɛ leḥkem-is, ad iḍmen talwit ur nfennu i ukersi n Dawed d tgelda-s, ad isserked tageldit-is, ad tt-yesbedd s tidett akked teɣdemt, si tura i dayem ; d ayagi ara yexdem Umeɣlal Illu n tzemmal, s leḥmala-s iṛeqqen. ⁷ Ameɣlal iceggeɛ-d awal-is mgal agdud n Yaɛqub, yeɣli-d ɣef tgelda n Isṛail.

²⁶ Aggur wis setta, iceggeɛ Yillu lmelk Jibrayil ɣer temdint n Naṣarit, di tmurt n Jlili. ²⁷ Iceggeɛ-it-id ɣer yiwet n tlemẓit i yexḍeb yiwen wergaz isem-is Yusef, yellan seg iẓuran n Dawed. Tilemẓit-agi isem-is Meryem. ²⁸ Ikcem lmelk ɣuṛ-s inna-yas : Sslam fell-am a tin iburek Yillu ! Ameɣlal yella yid-m. ²⁹ Meryem tedhec, tenna : D acu i d lmeɛna n imeslayen-agi ? ³⁰ Lmelk inna-yas : Ur ttaggad ara a Meryem ! S ṛṛeḥma-s tameqqrant, Illu yextaṛ-ikkem. ³¹ Atan ad trefdeḍ tadist, ad d-tesɛuḍ aqcic, semmi-yas Ɛisa, (lmeɛna-s : Amsellek). ³² Ad isɛu ccan d ameqqran, ad ittusemmi Mmi-s n Win-Ɛlayen. Ameɣlal, Illu, ad as-ifk akersi n tgeldit n jeddi-s Dawed. ³³ Ad iḥkem ɣef tarwa n Yaɛqub i dayem, tageldit-is ur tfennu ara. ³⁴ Meryem tenna i lmelk-nni : Amek ara d-iḍru yid-i wayagi nekk ur nezwiǧ ara ? ³⁵ Lmelk irra-yas : Atan ad d-irs fell-am Ṛṛuḥ imqeddes ; tazmert n Win-Ɛlayen ad kkem-tɣumm am tili, daymi aqcic-agi imqeddes ara d-ilalen ad ittusemmi Mmi-s n Yillu. ³⁶ Ilicaba i am-ittilin, ula d nettat attan s tadist ad d-tesɛu aqcic ɣas akken meqqret di leɛmeṛ. Tin akken iwumi semman tiɛiqeṛt, attan deg waggur wis setta, ³⁷ imi ulac ayen iwumi ur izmir Yillu. ³⁸ Meryem tenna : Aql-i d taqeddact n Umeɣlal, ad iḍru yid-i wayen i d-tenniḍ. Imiren Lmelk-nni yeǧǧa-tt, iṛuḥ.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.