Talalit n Yasuɛ

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Deg ussan-nni, yeffeɣ-d yiwen n lqanun sɣuṛ Qayṣar ameqqran ; ifka lameṛ ad ttujerrden imezdaɣ meṛṛa yellan di tmura-ines. ² Ajerred-agi amezwaru yeḍra asmi yella Kirinyus d lḥakem n tmurt n Surya. ³ Imdanen meṛṛa ṛuḥen ad ttujerrden mkul yiwen di taddart n lejdud-is. ⁴ Yusef yellan seg iẓuran n Dawed, yuli ula d netta si temdint n Naṣarit n tmurt n Jlili ɣer Bitelḥem, taddart n lejdud-is yellan di tmurt n Yahuda. ⁵ Iṛuḥ ad ittujerred netta d texḍibt-is Meryem yellan s tadist. ⁶ Mi ten-yuɣ lḥal dinna, iwweḍ-d lweqt i deg ara terbu (tarew) Meryem. ⁷ Tesɛa-d mmi-s amenzu, tettel-it, tesgen-it di lmedwed, imi ur ufin ara amkan deg usensu. ⁸ Di tmurt-nni, llan imeksawen ittnusun di lexlawi, ttɛassan lmal-nsen deg iḍ. ⁹ Ataya lmelk n Umeɣlal iban-asen-d, tamanegt n Umeɣlal tecceɛceɛ tezzi-yasen-d, ikcem-iten lxuf d ameqqran. ¹⁰ Lmelk inna-yasen : Ur ttaggadet ! Aql-i wwiɣ-awen-d Lexbeṛ n Lxir ara yesfeṛḥen agdud meṛṛa. ¹¹ Ass-agi di taddart n Dawed, ilul-awen-d yiwen wemsellek, d netta i d Lmasiḥ, Ssid. ¹² Atan wamek ara t-tɛeqlem : Ad tafem llufan yettel, iṭṭes di lmedwed. ¹³ Imiren kan, terna-d terbaɛt tameqqrant n lɛeskeṛ n igenwan ɣer lmelk-nni, cennun ttḥemmiden Illu, qqaren : ¹⁴ Lḥemd i Yillu deg imukan ɛlayen, lehna di ddunit ɣef yimdanen ɛzizen fell-as. ¹⁵ Akken uɣalen lmalayek-nni ɣer yigenni, imeksawen nnan wway gar-asen : Kkret ad nṛuḥet ɣer Bitelḥem, ad nẓer ayen i yeḍran, d wayen akka s wayes i aɣ-d-ixebbeṛ Umeɣlal. ¹⁶ Imiren kan ṛuḥen, ufan dinna Meryem d Yusef akked llufan-nni yeṭṭes di lmedwed. ¹⁷ Mi walan aqcic-nni, ḥkan-d ayen i sen-d-inna lmelk fell-as. ¹⁸ Wid akk yeslan s wayen i d-ḥkan imeksawen-nni, dehcen. ¹⁹ Meryem teḥrez imeslayen-nni deg ul-is, tettxemmim fell-asen. ²⁰ Mi uɣalen imeksawen-nni, ttḥemmiden ttcekkiṛen Illu ɣef wayen slan d wayen ẓran, imi ufan kullec akken i sen-d-ittuxebbeṛ.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.