Ajeṛṛeb d Leqdic n Yasuɛ

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Mi d-yuɣal Sidna Ɛisa seg wasif n Urdun iččuṛ d Ṛṛuḥ imqeddes, iwwi-t Ṛṛuḥ ɣer unezruf. ² Ṛebɛin wussan ur ičči, cciṭan ittjeṛṛib deg-s. Mi ɛeddan wussan-nni, yuɣal illuẓ. ³ Inna-yas cciṭan : Ma d Mmi-s n Yillu i telliḍ, ini-yas i wedɣaɣ-agi ad yuɣal d aɣṛum. ⁴ Sidna Ɛisa yerra-yas : Yura : Amdan ur ittɛic ara s weɣṛum kan. ⁵ Yuɣal yewwi-t cciṭan ɣer yiwen wemkan ɛlayen, deg yiwet n teswiɛt isken-as-d akk tigeldiwin n ddunit, ⁶ inna-yas : Ad ak-fkeɣ akk leḥkem-agi akked ccan n tgeldiwin-agi, axaṭer ttunefkent-iyi-d. Zemreɣ ad tent-fkeɣ i win i yi-ihwan ; ⁷ ma tseǧǧdeḍ zdat-i ad uɣalent akk d ayla-k. ⁸ Sidna Ɛisa yerra-yas : Yura : Ad tɛebdeḍ Ameɣlal, Illu-inek, i netta kan iwumi ara tseǧǧdeḍ. ⁹ Iwwi-t daɣen cciṭan ɣer temdint n Urucalim, issers-it ɣef yixf n ufakan, inna-yas : Ma d Mmi-s n Yillu i telliḍ, ḍegger iman-ik d akessar, ¹⁰ axaṭer yura : Ad ifk lameṛ i lmalayek-is i wakken ad ḥarbent fell-ak. ¹¹ Yura daɣen : Ad ak-awint gar ifassen-nsent, ad ḥadrent iḍarren-ik ɣef wedɣaɣ. ¹² Sidna Ɛisa yerra-yas : Yura daɣen : Ur tettjeṛṛibeḍ ara Ameɣlal, Illu-inek. ¹³ Mi i t-ijeṛṛeb Iblis s waṭas n tḥila ur as-yufi ara abrid, iṭṭaxeṛ fell-as alamma d tikkelt nniḍen. ¹⁴ Sidna Ɛisa yuɣal ɣer tmurt n Jlili yeččuṛ d tazmert n Ṛṛuḥ imqeddes, slan s yis di mkul tama n tmurt-agi. ¹⁵ Ikeččem ɣer leǧwameɛ n wat Isṛail isselmad, imdanen meṛṛa ttcekkiṛen-t. ¹⁶ Iṛuḥ ɣer temdint n Naṣarit anda yettuṛebba ; akken innum, ikcem ɣer lǧameɛ deg wass n usteɛfu. ¹⁷ Mi yekker ad d-iɣeṛ, fkan-as-d taktabt n nnbi Icaɛya, yeldi-tt, yufa amkan anda yura : ¹⁸ Ṛṛuḥ n Umeɣlal yella fell-i, axaṭer ixtaṛ-iyi i wakken ad beccṛeɣ Lexbeṛ n Lxir i yimeɣban, ad beccṛeɣ i yimeḥbas tilelli, i wakken ad d-rreɣ iẓri i yiderɣalen, ad kkseɣ lḥif ɣef wid ittwaḍelmen, ¹⁹ ad beccṛeɣ ɣef useggas i deg ara d-issers Ameɣlal ṛṛeḥma-ines. ²⁰ Ijmeɛ taktabt-nni, yerra-tt i uqeddac, imiren iqqim. Wid akk yellan di lǧameɛ ččan-t s tmuɣli. ²¹ Dɣa yenna-yasen : Ayen i wen-d-ɣṛiɣ akka, atan iḍra-d gar-awen ass-agi ! ²² Wehmen aṭas, tɛeǧǧben deg imeslayen i d-itteffɣen seg yimi-s, qqaren : Amek ? Mačči d mmi-s n Yusef wagi ?

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.