Yasuɛ Isseḥlay yerna Iɛeffu

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹⁷ Yiwen wass yella Sidna Ɛisa yesselmad. Llan dinna ifariziyen d imusnawen n ṭawrat, usan-d si tuddar n wat Jlili, n wat Yahuda akked temdint n Urucalim, qqimen smeḥsisen-as. Tazmert n Umeɣlal yellan yid-s tesseḥlay imuḍan. ¹⁸ Ha-ten-aya kra n yimdanen wwin-d yiwen wukrif akken deg usu-ines. Ttqelliben amek ara t-skecmen i wakken ad t-ssersen zdat n Sidna Ɛisa. ¹⁹ Imi aṭas n lɣaci i yellan, ur ufin ara ansi ara t-sɛeddin ; ulin ɣef ssqef, kksen kra n iqermuden, ṣubben-t-id s wusu-ines ɣer tlemmast n lɣaci, zdat n Sidna Ɛisa. ²⁰ Mi iwala liman-nsen, inna i umuḍin-nni : Ay argaz, ttwaɛfan-ak ddnubat-ik ! ²¹ Imusnawen akked ifariziyen bdan ttxemmimen qqaren : Amek izmer ad d-yini imeslayen-agi ? Wagi d lekfeṛ ! Anwa i izemren ad iɛfu ddnubat anagar Illu weḥd-s ? ²² Sidna Ɛisa yeẓran ayen i ttxemmimen, inna-yasen : Acuɣer tettxemmimem akka deg ulawen-nwen ? ²³ D acu i isehlen ad as-t-iniɣ ? Ttwaɛfan-ak ddnubat-ik neɣ kker telḥuḍ ? ²⁴ Ilaq-awen ad teẓrem d akken Mmi-s n wemdan yesɛa tazmert ad iɛfu ddnubat di ddunit-agi ! Izzi ɣer wukrif-nni, inna-yas : Kker ddem usu-inek tuɣaleḍ ɣer wexxam-ik ! ²⁵ Imiren kan ukrif-nni yekker zdat-sen, iddem usu i deg iḍleq, yuɣal ɣer wexxam-is, ittḥemmid Illu. ²⁶ Wehmen meṛṛa lɣaci, ttḥemmiden Illu, ikcem-iten lxuf qqaren : Ass-agi neẓra ayen werjin neẓri ! ²⁷ Mi yeffeɣ Sidna Ɛisa, iwala yiwen umekkas n tebzert isem-is Lawi yeqqim di texxamt anda ttxelliṣen tabzert (leɣṛama), iqeṛṛeb ɣuṛ-s inna-yas : Ddu yid-i. ²⁸ Lawi yekker, iǧǧa kullec idda yid-s. ²⁹ Lawi yeɛreḍ Sidna Ɛisa ɣer wexxam-is, ihegga-yas imensi. Aṭas n imekkasen n tebzert d yimdanen nniḍen i yeqqimen yid-sen ad ččen. ³⁰ Ifariziyen d imusnawen n ṭawrat n ukabar-nsen iɣaḍ-iten lḥal, nnan i yinelmaden-is : Acuɣer i tettettem, tettessem akked imekkasen n tebzert imakaren d imednuben ? ³¹ Sidna Ɛisa yerra-yasen : Mačči d wid iṣeḥḥan i yeḥwaǧen ṭṭbib, i t-iḥwaǧen d imuḍan. ³² Ur d-usiɣ ara ad ssiwleɣ i yiḥeqqiyen, meɛna i yimednuben i wakken ad tuben.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.