Ɛafu d Wesfel

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

⁹ Inna-d daɣen lemtel-agi ɣef kra n yimdanen iḥesben iman-nsen d iḥeqqiyen ɣer Ṛebbi, nutni ḥeqqren wiyaḍ : ¹⁰ Sin yirgazen ulin ɣer ufakan ad ẓẓallen ; yiwen d afarizi, wayeḍ d amekkas n tebzert. ¹¹ Afarizi-nni ibedd ittẓalla yeqqar deg iman-is : Ad ak-ḥemdeɣ ad ak-cekkṛeɣ ay Illu, imi ur lliɣ ara am wid yellan d imcumen, d ixeddaɛen, yettɛicin di zzna ; ad ak-cekkṛeɣ daɣen imi ur lliɣ ara am umekkas-agi n tebzert. ¹² Ttuẓumeɣ sin wussan di dduṛt, ttakeɣ leɛcuṛ seg wayen sɛiɣ. ¹³ Amekkas-nni ibedd mebɛid, issetḥa ad irfed ula d allen-is ɣer igenni, yekkat deg idmaren-is iqqar : Ay Illu, ḥun fell-i nekk yellan d amednub ! ¹⁴ Ad wen-d-iniɣ : Amekkas-nni yuɣal ɣer wexxam-is di lehna, yettwaqbel ɣer Yillu, ma d afarizi-nni ur ittwaqbel ara. Kra n win yessemɣaṛen iman-is ad d-ires, ma d win yessimẓiyen iman-is ad yaɛlay. ¹⁵ Lɣaci ttawin-as-d ula d llufanat i wakken ad issers afus-is fell-asen ad ten-ibarek. Inelmaden-is mi walan ayagi, ttnaɣen-ten. ¹⁶ Sidna Ɛisa issawel-asen-d inna : Anfet-asen i warrac imeẓyanen ad d-asen ɣuṛ-i ur ten-ttarrat ara, axaṭer tagelda n Yillu, tettwahegga i wid yellan am nutni. ¹⁷ Ad wen-iniɣ tidett : Kra n win ur neqbil ara tagelda n Yillu, am weqcic ameẓyan, ur tt-ikeččem ara. ¹⁸ Yiwen umeṛkanti isteqsa Sidna Ɛisa yenna-yas : Ay aselmad lɛali, d acu i yi-ilaqen ad t-xedmeɣ i wakken ad sɛuɣ tudert n dayem ? ¹⁹ Sidna Ɛisa yenna-yas : Acuɣer i yi-d-tenniḍ d lɛali-yi ? Ulac win yellan d lɛali-t anagar Illu weḥd-s ! ²⁰ Tessneḍ ayen i d-tenna ṭawrat n Musa : Ur xeddem ara zzna, ur neqq ara, ur ttaker ara, ur ttcehhid ara s zzuṛ, qadeṛ baba-k d yemma-k. ²¹ Argaz-nni yenna-yas : Ayagi akk xeddmeɣ-t seg wasmi lliɣ d ameẓyan. ²² Mi yesla Sidna Ɛisa i yimeslayen-agi, yenna-yas : Ihi txuṣṣ-ik yiwet n lḥaǧa kan : Ṛuḥ zzenz ayen akk tesɛiḍ, seddeq-it i yigellilen i wakken ad tesɛuḍ agerruj deg igenni, tuɣaleḍ-d ad tedduḍ yid-i. ²³ Argaz-nni mi yesla i yimeslayen-agi yeɣli-d fell-as leḥzen imi d ameṛkanti i yella. ²⁴ Mi t-iwala yeḥzen, Sidna Ɛisa yenna : Acḥal i sen-iwɛeṛ i wid yesɛan cci ad kecmen ɣer tgelda n Yillu ! ²⁵ Ishel i welɣem ad iɛeddi di tiṭ n tissegnit wala i umeṛkanti ad ikcem ɣer tgelda n Yillu. ²⁶ Wid i as-islan, nnan-as : Anwa i izemren ad ittusellek ? ²⁷ Sidna Ɛisa yerra-yasen : Ayen yellan d lmuḥal i wemdan ishel ɣer Yillu. ²⁸ Buṭrus inna-yas : I nekni yeǧǧan kullec i wakken ad neddu yid-k ? ²⁹ Sidna Ɛisa yenna-yasen : Ad wen-iniɣ tidett : Kra n win iǧǧan axxam-is, tameṭṭut-is, ayetma-s, imawlan-is neɣ arraw-is ɣef ddemma n tgelda n Yillu, ³⁰ ad as-d-ittunefk di ddunit-agi kteṛ n wayen iǧǧa yerna ɣer zdat, ad isɛu tudert n dayem.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.