Ḥemmel Ṛebbi akked Ḥemmel Lǧar-ik

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

²⁵ Ikker-d yiwen umusnaw n ṭawrat yebɣan ad ijeṛṛeb Sidna Ɛisa, yenna-yas : A Sidi, d acu ara xedmeɣ i wakken ad sɛuɣ tudert n dayem ? ²⁶ Sidna Ɛisa yerra-yas : D acu yuran di ṭawrat ? D acu i teɣriḍ deg-s ? ²⁷ Irra-yas-d : Ad tḥemmleḍ Ameɣlal, Illu-inek, s wul-ik d ṛṛuḥ-ik, s wayen yellan di tezmert-ik akked lɛeqliya-k. Ad tḥemmleḍ daɣen wiyaḍ am yiman-ik. ²⁸ Sidna Ɛisa yenna-yas : Ayen akka i d-tenniḍ d tidett, xdem akka ad tesɛuḍ tudert n dayem ! ²⁹ Amusnaw-nni n ṭawrat i yebɣan ad ifk lḥeqq i yiman-is, inna i Sidna Ɛisa : Anwa-ten wiyaḍ-agi ? ³⁰ Sidna Ɛisa yerra-yas : Yiwen wergaz iṣubb-d si temdint n Urucalim ɣer temdint n Ariḥa ; sqaṭṭɛen-as imakaren ɛerran-t rnan wwten-t, ṛuḥen ǧǧan-t ur immut ur iddir. ³¹ Iɛedda-d syenna yiwen umesfel, mi t-iwala iwwet iɛedda si tama nniḍen. ³² Iɛedda-d daɣen seg webrid-nni yiwen wemṛabeḍ n wat Lawi, iwala-t, ikemmel abrid-is iṛuḥ. ³³ Ataya yiwen ubeṛṛani n tmurt n Samarya, iwweḍ-d ɣuṛ-s, mi t-iwala iɣaḍ-it. ³⁴ Iqeṛṛeb ɣuṛ-s, idhen leǧruḥ-is s zzit d ccṛab, icudd-iten ; isserkeb-it ɣef zzayla-s, yewwi-t ɣer yiwen wexxam n yemsafren, ilha-d yid-s. ³⁵ Azekka-nni yefka sin yiṣurdiyen i bab n wexxam-nni, yenna-yas : Bedd ɣuṛ-s, ayen ara tṣerrfeḍ n zzyada fell-as, ad ak-t-id-kemmleɣ asmi ara d-uɣaleɣ. ³⁶ Di tlata-agi, anwa i iḥemmlen argaz-agi yettuɛerran am yiman-is ? ³⁷ Amusnaw-nni yerra-yas : D win akken iḥunen fell-as, i s ixedmen lxir. Sidna Ɛisa yenna-yas : Ṛuḥ ula d kečč xdem akken.

²⁷ Ma d nekk ad wen-iniɣ i kunwi i d-ittḥessisen : Ḥemmlet iɛdawen-nwen, xedmet lxir i wid i kkun-ikeṛhen. ²⁸ Barket wid i kkun-ineɛlen, dɛut s lxir i wid i kkun-iḍelmen. ²⁹ Ma yewwet-ik yiwen ɣer lḥenk, sendi-yas lḥenk nniḍen. Ma yekkes-ak yiwen abeṛnus-ik, anef-as ad irnu ula d aqenduṛ-ik. ³⁰ Efk-as ayen yuḥwaǧ i win i ak-d-issutren ; win i ak-ikksen kra, ur ttṛaǧu ara ad ak-t-id-yerr. ³¹ Xedmet i wiyaḍ ayen i tebɣam ad wen-t-xedmen i kunwi.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.