Tiririyin Yemxalafen (yemgaraden) n Ṛebbi

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Ass-nni kan, yeffeɣ-d Sidna Ɛisa seg wexxam, iṛuḥ ad iqqim rrif n yilel, ² d izumal n lɣaci i as-d-izzin, dɣa yuli ɣer teflukt, iqqim. Lɣaci ibedd ɣef rrif n yilel, ³ netta ibda isselmad-iten s lemtul iqqar-asen : Yiwen ufellaḥ iffeɣ ad izreɛ. ⁴ Mi izerreɛ, ɣlin-as kra n iɛeqqayen rrif n webrid, usan-d igḍaḍ (ifṛax igenni) ččan-ten. ⁵ Kra iɛeqqayen nniḍen ɣlin deg wakal yeččuṛen d iẓra, mɣin-d s lemɣawla axaṭer ulac aṭas n wakal. ⁶ Mi yebda wezɣal, izlef imɣan-nni dɣa qquren, axaṭer ur sɛin ara iẓuran lqayen. ⁷ Kra iɛeqqayen nniḍen ɣlin gar isennanen. Isennanen-nni gman dɣa ɣummen-ten. ⁸ Meɛna kra iɛeqqayen ɣlin deg wakal yelhan : Fkan-d tigedrin, ta tefka-d meyya n iɛeqqayen, ta settin, tayeḍ tlatin. ⁹ Win yesɛan imeẓẓuɣen isel-d !

¹⁸ Ad wen-d-iniɣ lmeɛna n lemtel n win izerrɛen : ¹⁹ Mi ara isel wemdan i wawal yeɛnan tagelda n igenwan, ur t-ifhim ara, ittemcabi ɣer yiri n webrid i ɣer tɣelli zzerriɛa ; d cciṭan i d-ittasen ad iqleɛ ayen izerɛen deg ul-is. ²⁰ Wayeḍ ittemcabi ɣer wakal-nni yeččuṛen d iẓra anda teɣli zzerriɛa. Mi ara isel i Wawal n Yillu, iqebbel-it s lfeṛḥ, ²¹ meɛna ur t-ittaǧǧa ara ad iger iẓuran deg-s, ur ittaṭṭaf ara. Mi ara d-tas lmeḥna neɣ aqehheṛ ɣef ddemma n Wawal n Yillu, ad iǧǧ imiren kan liman-is. ²² Wayeḍ daɣen ittemcabi ɣer zzerriɛa yeɣlin gar isennanen. Mi ara isel i Wawal n Yillu, iɣeblan n ddunit d ṭṭmeɛ n rrbeḥ ttɣummun awal-nni, dɣa ur d-ittak ara lfakya. ²³ Wayeḍ icuba daɣen ɣer zzerriɛa yeɣlin deg wakal yelhan, mi ara isel i Wawal n Yillu, ifehhem-it, daymi i d-ittak lfakya ! Yal aɛeqqa ittak-d : Wa tlatin, wa settin, wa meyya n tɛeqqayin.

⁴⁴ Tagelda n igenwan tettemcabi ɣer ugerruj yeffren deg yiwen n yiger. Yiwen wergaz yufa-t, yuɣal iffer-it. Si lfeṛḥ-nni i yefṛeḥ, iṛuḥ izzenz ayen akk yesɛa i wakken ad yaɣ iger-nni. ⁴⁵ Tagelda n igenwan tettemcabi daɣen ɣer yiwen n ttajer ittqelliben tiɛeqcin ifazen. ⁴⁶ Mi yufa yiwet ifazen ɣef tiyaḍ, iṛuḥ izzenz ayen akk yesɛa, yuɣal-d yuɣ-itt.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.