Tazmert n Yasuɛ nnig Lmut

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Di taddart n Bitanya, llant snat n tyessetmatin, Marṭa d Meryem akked gma-tsent Laɛẓar ; ² Meryem, d tin i idehnen iḍarren n Sidna Ɛisa s leɛṭer terna tesfeḍ-iten s ucebbub-is ; tesɛa gma-s Laɛẓar, ihlek inṭer. ³ Yessetma-s ceggɛent ɣer Sidna Ɛisa ad as-inin : A Sidi, atan weḥbib-ik yuḍen. ⁴ Mi yesla Sidna Ɛisa s lexbeṛ-agi yenna : Lehlak-agi ur issawaḍ ara ɣer lmut, lameɛna ad d-isbeggen tamanegt n Yillu ; s yis daɣen ara d-tban tmanegt n Mmi-s n Yillu. ⁵ Sidna Ɛisa iḥemmel aṭas Marṭa, Meryem akked Laɛẓar. ⁶ Ɣas akken isla s Laɛẓar yuḍen, yerna iqqim sin wussan deg wemkan-nni anda yella. ⁷ Dɣa yenna i yinelmaden-is : Yyaw ad nuɣalet ɣer tmurt n Yahuda. ⁸ Nnan-as : A Sidi, mačči aṭas aya seg mi ttnadin wat Isṛail ad ak-nɣen s iblaḍen, tura tebɣiḍ ad tuɣaleḍ ɣer dinna ? ⁹ Sidna Ɛisa yerra-yasen : Ɛni ur llint ara tnac n swayeɛ deg wass ? Ma ileḥḥu yiwen deg wass ur t-kkaten ara wuguren axaṭer tella tafat, ittwali abrid. ¹⁰ Lameɛna ma ileḥḥu deg iḍ ad imdeṛkal axaṭer ulac tafat. ¹¹ Mi d-inna ayagi, yerna yenna-yasen : Aḥbib-nneɣ Laɛẓar tewwi-t tnafa, ad ṛuḥeɣ ad t-d-ssakiɣ. ¹² Nnan-as inelmaden-is : A Sidi, ma d taguni i yeṭṭes ihi ad d-ikker. ¹³ Sidna Ɛisa yenna-d ayagi ɣef lmut n Laɛẓar, nutni nwan ɣef tguni i d-immeslay. ¹⁴ Dɣa yenna-yasen ɛinani : Laɛẓar immut, ¹⁵ yerna feṛḥeɣ ɣef ddemma-nwen imi ur lliɣ ara dinna di teswiɛt-nni, axaṭer ayagi d ayen ara yernun di liman-nwen. Yyaw tura ad nṛuḥet ɣuṛ-s. ¹⁶ Ṭuma iwumi qqaren Akniw, yenna i yinelmaden-is nniḍen : Yyaw ad neddut ula d nekni i wakken ad nemmet yid-s. ¹⁷ Mi qṛib ad yaweḍ ɣer dinna, Sidna Ɛisa isla d akken ṛebɛa wussan aya seg mi i meḍlen Laɛẓar. ¹⁸ Ad ilin wazal n tlata kilumitrat gar taddart n Bitanya d temdint n Urucalim. ¹⁹ Daymi aṭas n lɣaci i d-yusan ɣer Marṭa d Meryem ad tent-ṣebbren ɣef lmut n gma-tsent. ²⁰ Akken kan i tesla Marṭa d akken Sidna Ɛisa iteddu-d ɣer taddart, tuzzel ɣuṛ-s ad t-temmager. Ma d Meryem teqqim deg wexxam. ²¹ Marṭa tenna i Sidna Ɛisa : A Sidi, lemmer dagi i telliḍ, tili gma ur immut ara. ²² Lameɛna ẓriɣ ula d tura, ayen akk ara tessutreḍ i Yillu ad ak-t-id-iqbel. ²³ Sidna Ɛisa inna-yas : Gma-m ad d-yuɣal ɣer tudert. ²⁴ Marṭa terra-yas : Ẓriɣ ad d-yuɣal ɣer tudert ass aneggaru, ass n ḥeggu n lmeyytin. ²⁵ Sidna Ɛisa inna-yas : D nekk i d ḥeggu, d nekk i d tudert. Win ara yamnen yis-i ad yidir ɣas ma yemmut. ²⁶ Yal amdan yeddren, yumnen yis-i, ur ittmettat ara maḍi. Tumneḍ s wannect-agi ? ²⁷ Marṭa tenna-yas : Umneɣ a sidi, d kečč i d Lmasiḥ, d kečč i d Mmi-s n Yillu, win akken i ilaqen ad d-yas ɣer ddunit. ²⁸ Syenna, Marṭa tṛuḥ tessawel i weltma-s Meryem tenna-yas s tuffra : Sidna Ɛisa iwweḍ-d, ibɣa ad kkem-iẓer. ²⁹ Mi tesla s lexbeṛ-agi, tekker Meryem tuzzel ɣer Sidna Ɛisa. ³⁰ Yuɣ lḥal urɛad i d-ikcim ɣer taddart, mazal-it deg umkan-nni anda akken i t-temmuger Marṭa. ³¹ Wid yellan ttṣebbiren deg-s deg wexxam, mi tt-walan tekker teffeɣ s tazzla, ḍefren-tt, nwan ɣer uẓekka i tṛuḥ i wakken ad tettru ɣef gma-s. ³² Mi tewweḍ Meryem ɣer wemkan anda yella Sidna Ɛisa, akken kan i t-twala, teɣli ɣer iḍarren-is tenna : A Sidi, lemmer dagi i telliḍ tili gma ur immut ara. ³³ Mi tt-iwala Sidna Ɛisa tettru nettat d wid yellan yid-s, isḥassef aṭas, tergagi tasa-s. ³⁴ Inna-yasen : Anda i t-tmeḍlem ? Netni rran-as : Yya-d ad twaliḍ a sidi. ³⁵ Dɣa Sidna Ɛisa yettru. ³⁶ Mi t-walan ittru, nnan : Walit acḥal i t-iḥemmel ! ³⁷ Ma d kra deg-sen qqaren : Netta i d-yerran iẓri i uderɣal, ur issaweḍ ara ad issemneɛ Laɛẓar si lmut ! ³⁸ Sidna Ɛisa yesḥassef i tikkelt nniḍen dɣa iṛuḥ ɣer uẓekka. Aẓekka-nni d yiwen lɣaṛ imedlen s yiwen weẓru d ameqqran. ³⁹ Sidna Ɛisa yenna : Kkset aẓru-yagi ! Marṭa weltma-s n lmeyyet-nni tenna : A Sidi, ṛebɛa wussan aya seg mi yettwamḍel, ad yili yebda ittriḥ ! ⁴⁰ Sidna Ɛisa irra-yas : Ur am-d-nniɣ ara ma tumneḍ ad twaliḍ tamanegt n Yillu ? ⁴¹ Kksen aẓru-nni, yerfed Sidna Ɛisa allen-is ɣer igenni yenna : Tanemmirt-ik a Baba, axaṭer tqebleḍ taẓallit-iw. ⁴² Nekkini ẓriɣ tqebbleḍ-iyi-d daymen, lameɛna nniɣ-d akka ɣef ddemma n wid i yi-d-izzin dagi i wakken ad amnen d akken d kečč i yi-d-iceggɛen. ⁴³ Imiren kan iɛeggeḍ s lǧehd yenna : A Laɛẓar, ffeɣ-d syenna ! ⁴⁴ Ataya lmeyyet-nni iffeɣ-d seg uẓekka, iḍarren-is d ifassen-is ttlen, udem-is iɣumm s lekfen. Sidna Ɛisa yenna i wid yellan dinna : Kkset-as lekfen, teǧǧem-t ad iṛuḥ !

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.