Annuz n Yasuɛ

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Uqbel Lɛid n Usuref, Sidna Ɛisa iẓra d akken tewweḍ-d teswiɛt i deg ara yeffeɣ si ddunit, akken ad iṛuḥ ɣer Baba-s. Ɣef wannect-agi, isbeggen-d leḥmala-ines i yinelmaden-is yellan di ddunit, yerna iǧǧa-yasen-d lmeɛna d tameqqrant. ² Llan tetten imensi n lɛid, cciṭan ikcem yakan deg wul n Yudas, mmi-s n Semɛun n Qeṛyut, iwelleh-it ad ixdeɛ Sidna Ɛisa, ad t-izzenz. ³ Sidna Ɛisa yeẓra d akken Ababat yerra kullec gar ifassen-is, yeẓra sɣuṛ Yillu i d-yusa, ɣuṛ-s ara yuɣal. ⁴ Ikker ɣef imensi, ikkes abeṛnus-is, iddem-d yiwen ubeḥnuq (ucettiḍ) ibges yis. ⁵ Syenna, ismar-d aman ɣer yiwet n tbaqit, ibda issirid iḍarren n inelmaden-is, isfeḍ-iten s ubeḥnuq-nni i icudd ɣef wammas-is. ⁶ Mi yewweḍ ɣer Semɛun Buṭrus yenna-yas-d : A Sidi, d kečč ara iyi-ssirden iḍarren ? ⁷ Sidna Ɛisa irra-yas : Ayen xedmeɣ akka ur t-tfehhmeḍ ara tura, ɣer zdat ara t-tfehmeḍ. ⁸ Buṭrus inna-yas : Ala ! D lmuḥal ad iyi-tessirdeḍ iḍarren-iw ! Sidna Ɛisa inna-yas : Ma ur ak-ssardeɣ ara iḍarren-ik ur d-iqqim wacemma i aɣ-icerken. ⁹ Semɛun Buṭrus inna-yas : A Sidi, ihi ur iyi-ssirid ara iḍarren kan, ssired-iyi ula d ifassen d uqerruy-iw. ¹⁰ Sidna Ɛisa inna-yas : Win yessarden yakan d azedgan, anagar iḍarren-is i yeḥwaǧ ad ten-issired axaṭer zeddig meṛṛa. Kunwi aql-ikkun zeddigit lameɛna mačči akken ma tellam dagi. ¹¹ Sidna Ɛisa yeẓra d anwa ara t-ixedɛen, daymi i yenna i yinelmaden-is : “Kunwi ur zeddigit ara irkul.” ¹² Mi sen-issared iḍarren-nsen, irra abeṛnus-is, yuɣal ɣer wemkan-is yenna-yasen : Tfehmem ayen akka i wen-xedmeɣ neɣ ala ? ¹³ Tessawalem-iyi : D aselmad, d Ssid, tesɛam lḥeqq axaṭer d tidett ! ¹⁴ Ma yella nekk yellan d aselmad, d Ssid, ssardeɣ-awen iḍarren-nwen, ilaq-awen ad tettemsiridem iḍarren wway gar-awen. ¹⁵ Fkiɣ-awen-d lemtel i wakken ula d kunwi ad txedmem akken i wen-xedmeɣ. ¹⁶ S tidett nniɣ-awen : Aqeddac ur yugar ara Ssid-is, amceggeɛ ur yugar ara win i t-d-iceggɛen. ¹⁷ Amarezg-nwen ma tessnem ayagi, awi-d kan ad t-txedmem.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.