Yasuɛ yettwaṭṭef

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

³⁶ Imiren Sidna Ɛisa iṛuḥ yid-sen ɣer yiwen wemkan ittusemman Jitsimani, inna i yinelmaden-is : Qqimet dagi, nekk ad ṛuḥeɣ ad ẓẓalleɣ dihin. ³⁷ Iwwi yid-s Buṭrus akked sin warraw-nni n Zabadi ; ibda ikcem-it leḥzen d uɣilif. ³⁸ Dɣa inna-yasen : Ḥusseɣ s leḥzen n lmut, qqimet dagi, ɛiwzet yid-i ! ³⁹ Iṛuḥ iɣli ɣef wudem, ibda ittẓalla yeqqar : A Baba, ma yella wamek, ssebɛed fell-i leɛtab-agi ! Meɛna akken tebɣiḍ keččini, mačči akken bɣiɣ nekkini. ⁴⁰ Yuɣal-d ɣer inelmaden-is, yufa-ten-id ṭṭsen, yenna i Buṭrus : Ur tezmirem ara ad tɛiwzem yid-i ula d yiwet n ssaɛa ? ⁴¹ Ɛiwzet, ẓẓallet, i wakken ur tɣellim ara deg ujeṛṛeb ! Axaṭer ṛṛuḥ dayem yewjed ma d tafekka d tameɛlalt ! ⁴² Ibɛed akkin tikkelt tis snat i wakken ad iẓẓall, yenna : A Baba, ma yella ulamek ara tesbeɛdeḍ fell-i leɛtab-agi, ma ilaq ad iyi-d-yaweḍ ! Ad iḍru lebɣi-k ! ⁴³ Mi d-yuɣal, yufa-ten-id daɣen ṭṭsen, iɣleb-iten nuddam. ⁴⁴ Iǧǧa-ten, issebɛed iman-is daɣen fell-asen, idɛa tikkelt tis tlata am tikkelt-nni tamezwarut. ⁴⁵ Mi d-yuɣal ɣer inelmaden-is, yufa-ten-id mazal-iten ṭṭsen ; inna-yasen : Lweqt i deg ara yettwisellem Mmi-s n wemdan ɣer ifassen n yemcumen iwweḍ-d, kunwi mazal-ikkun teṭṭsem ? ⁴⁶ Dɣa inna-yasen : Kkret fell-awen, ataya iteddu-d win i yi-izzenzen ! ⁴⁷ Mazal-it ittmeslay mi d-iwweḍ Yudas yellan d yiwen si tnac-nni inelmaden. Ddan-d yid-s aṭas n lɣaci s iɛekkzan d ijenwiyen, ceggɛen-ten-id yimseflen imeqqranen akked imṛayen n wegdud. ⁴⁸ Win akken i t-izzenzen, imsefham yid-sen, inna-yasen : Win i ɣef ara sellmeɣ, d win ara teṭṭfem ! ⁴⁹ Imiren, iqeṛṛeb ɣer Sidna Ɛisa inna-yas : Sslam fell-ak a sidi ! Dɣa isellem fell-as. ⁵⁰ Sidna Ɛisa inna-yas : Ay ameddakel, ayen ɣef i d-tusiḍ ad t-txedmeḍ, xdem-it ! Dɣa lɣaci-nni qeṛṛben ɣer Sidna Ɛisa ṭṭfen-t. ⁵¹ Yiwen seg wid yeddan d Sidna Ɛisa ijbed-d ajenwi-ines, iwwet aqeddac n umesfel ameqqran, igzem-as ameẓẓuɣ-is. ⁵² Sidna Ɛisa inna-yas : Err ajenwi-inek ɣer wemkan-is, axaṭer kra n win ara irefden ajenwi, ad immet s ujenwi ! ⁵³ Ɛni tɣileḍ ur zmireɣ ara ad ssutreɣ i Baba ad iyi-d-iceggeɛ luluf n lmalayek ? ⁵⁴ Amek ihi ara ttwikemmlent Tira i d-ixebbṛen d akken ilaq ad d-iḍru wayagi meṛṛa ? ⁵⁵ Imiren Sidna Ɛisa yenna i lɣaci : Kul ass ttiliɣ yid-wen deg ufakan, sselmadeɣ, ur iyi-teṭṭifem ara, ass-agi tusam-d ɣuṛ-i s iɛekkzan d ijenwiyen am akken d bu tmegṛaḍ i lliɣ ! ⁵⁶ Meɛna annect-agi meṛṛa yeḍra-d i wakken ad ttwikemmlent tira n lanbiya. Imiren, inelmaden meṛṛa ǧǧan-t, yal yiwen ɣer wanda yerwel.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.