Aṣlab

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

³² Wwin daɣen sin n yemcumen i wakken ad ten-semmṛen akked Sidna Ɛisa. ³³ Mi wwḍen ɣer yiwen wemkan ittusemman Iɣil Uqerruy, semmṛen-t dinna ɣef umidag netta d sin-nni yimbaṣiyen, yiwen ɣer tama-s tayeffust wayeḍ ɣer tama-s tazelmaṭ. ³⁴ Sidna Ɛisa yenna : A Baba ɛfu-yasen imi ur ẓrin ara d acu i xeddmen. Iɛsekṛiwen-nni gren tasɣaṛt ad feṛqen gar-asen llebsa-ines. ³⁵ Lɣaci i ibedden dinna ttfeṛṛiǧen ; imseflen smesxiṛen fell-as qqaren : Isellek wiyaḍ, ad isellek iman-is tura ma yella d tidett d Lmasiḥ i yextaṛ Yillu. ³⁶ Iɛsekṛiwen daɣen smesxiṛen fell-as, qeṛṛben ɣuṛ-s bɣan ad as-sswen lxell, ³⁷ qqaren-as : Ma d agellid n wat Isṛail i telliḍ, sellek iman-ik. ³⁸ Ddmen-d daɣen yiwet n telwiḥt, semmṛen-tt sennig uqerruy-is, uran deg-s : Wagi d agellid n wat Isṛail. ³⁹ Yiwen seg imbaṣiyen-nni ittusemmṛen ɣef umidag, ireggem Sidna Ɛisa, yeqqar-as : Ma d Lmasiḥ i telliḍ sellek iman-ik tsellkeḍ-aɣ ula d nekni. ⁴⁰ Lameɛna wayeḍ ilumm-it inna-yas : Ur tuggadeḍ ara Illu, kečč ittusemmṛen am netta ? ⁴¹ Nekni ma ḥekmen fell-aɣ d lḥeqq axaṭer nuklal lmut s wayen i nexdem ; lameɛna netta ur ixdim acemma n wayen n diri. ⁴² Izzi ɣer Sidna Ɛisa yenna-yas : A Ɛisa, mmekti-yi-d mi ara d-taseḍ di tgeldit-ik. ⁴³ Sidna Ɛisa yerra-yas : Ad ak-iniɣ tidett, ass-agi ad tiliḍ yid-i di lǧennet. ⁴⁴ Ad tili d lejwahi n tnac, iɣli-d ṭṭlam ɣef tmurt meṛṛa armi d tlata n tmeddit. ⁴⁵ Leḥjab n ufakan, icerreg di tlemmast. ⁴⁶ Sidna Ɛisa iɛeggeḍ s ṣṣut ɛlayen : A Baba, atan ṛṛuḥ-iw gar ifassen-ik. Mi yenna imeslayen-agi, yeffeɣ-it ṛṛuḥ. ⁴⁷ Aqebṭan mi yeẓra ayen iḍran ittweḥḥid Illu yenna : D tidett, amdan-agi d aḥeqqi. ⁴⁸ Lɣaci akk i iḥedṛen dinna, mi walan ayen iḍran ḥeznen, uɣalen syenna kkaten deg idmaren-nsen. ⁴⁹ Wid akk iḥemmlen Sidna Ɛisa qqimen deg mebɛid ttmuqulen ayen iḍran, llant gar-asen tilawin i d-iddan yid-s si tmurt n Jlili. ⁵⁰ Illa yiwen wergaz gar imseflen imeqqranen n useqqamu n ccṛeɛ, isem-is Yusef, n taddart n Arimati n wat Yahuda. ⁵¹ Ur iqbil ṛṛay-nsen, ur iqbil lecɣal-nsen, d argaz n lɛali, d aḥeqqi yerna yettṛaǧu tagelda n Yillu. ⁵² Iṛuḥ ɣer Bilaṭus issuter-as lǧetta n Sidna Ɛisa. ⁵³ Issers-itt-id seg umidag, ittel-itt di lekfen, iger-itt deg uẓekka yeɣzan deg weẓru anda ur imḍil ula d yiwen. ⁵⁴ Ass-nni d ass n lǧemɛa i deg ttheggin lɣaci iman-nsen i wass n ssebt yellan d ass n usteɛfu. ⁵⁵ Tilawin-nni i d-iddan d Sidna Ɛisa si tmurt n Jlili, ddant d Yusef ɣer uẓekka, walant amek i ssersen lǧetta-s. ⁵⁶ Syenna uɣalent ɣer yexxamen-nsent i wakken ad heggint leɛṭer d wayen xeddmen i lmeyytin, i lǧetta n Sidna Ɛisa. Azekka-nni n ssebt, steɛfant akken i d-tenna ṭawrat.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.