Ḥeggu (Yeḥya-d) si lmut d Tuɣalin ɣer igenni

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹¹ Yuɣ lḥal Meryem tella di beṛṛa, tettru tama n uẓekka. Mi tella tettru, tmuqel ɣer daxel, ¹² twala sin lmalayek s llebsa tamellalt, qqimen deg wemkan-nni anda akken i ssersen lǧetta n Sidna Ɛisa, yiwen ɣer uqerruy wayeḍ ɣer iḍarren, ¹³ nnan-as : Acuɣer i tettruḍ ? Meryem tenna-yasen : Wwin Ssid-iw, yerna ur ẓriɣ ara anda i t-rran ! ¹⁴ Urɛad tfukk ameslay tmuqel ɣer deffir, twala Sidna Ɛisa ibedd-d, lameɛna ur teɛqil ara d akken d netta. ¹⁵ Sidna Ɛisa inna-yas : Acuɣer i tettruḍ ? Ɣef wanwa i tettqellibeḍ ? Meryem tɣil d aɛessas n tmazirt, tenna-yas : A sidi, ma yella d kečč i t-iddmen, ini-yi-d ɣer wanda i t-tewwiḍ akken ad ṛuḥeɣ ad t-id-awiɣ. ¹⁶ Sidna Ɛisa yenna-yas : Meryem ! Tezzi ɣuṛ-s, dɣa tenna-yas s tɛibṛanit : Rabuni ! (Yeɛni : A Sidi !) ¹⁷ Sidna Ɛisa inna-yas : Ur iyi-d-ttmassa ara, axaṭer urɛad uliɣ ɣer Baba. Lameɛna ṛuḥ ini-yasen i watmaten-iw : Aql-iyi ad aliɣ ɣer Baba yellan d Baba-twen, ɣer Yillu-yiw yellan d Illu-nwen. ¹⁸ Meryem tamagdalit tṛuḥ ad tessiweḍ lexbeṛ i yinelmaden-is. Tenna-yasen : Ẓriɣ Ssid-nneɣ, atah wayen i yi-d-inna ! ¹⁹ Ass n lḥedd tameddit, inelmaden llan deg yiwen wexxam ɣelqen tiwwura axaṭer uggaden at Isṛail. Ataya Sidna Ɛisa ibedd-d gar-asen, yenna-yasen : Talwit fell-awen ! ²⁰ Mi sen-d-inna akkagi, isken-asen-d ifassen-is akked yidis-is. Inelmaden feṛḥen aṭas imi walan Ssid-nsen. ²¹ Sidna Ɛisa inna-yasen daɣen : Talwit ad d-ters fell-awen. Akken i yi-d-iceggeɛ Baba, nekk daɣen ad kkun-ceggɛeɣ. ²² Mi d-inna annect-agi, isuḍ ɣef inelmaden-is, inna-yasen : Steṛḥbet s Ṛṛuḥ imqeddes. ²³ Wid iwumi ara tsemmḥem ddnubat ad sen-ttwisemmḥen, ma d wid iwumi ur tettsemmiḥem ara ddnubat-nsen ad qqimen i yirawen-nsen. ²⁴ Ṭuma, iwumi qqaren Akniw, yellan d yiwen si tnac-nni, ur illi ara yid-sen mi d-yusa Sidna Ɛisa. ²⁵ Inelmaden nniḍen nnan-as : Neẓra Sidna Ɛisa ! Meɛna netta irra-yasen : Ma ur walaɣ ara ccwami n imesmaṛen deg ifassen-is, ma ur sriseɣ ara aḍad-iw anda ntan imesmaṛen, ma ur sriseɣ ara afus-iw ɣef yidis-is, ur ttamneɣ ara. ²⁶ Mi ɛeddan tmanya n wussan, inelmaden nnejmaɛen daɣen deg wexxam, tikkelt-agi yella yid-sen Ṭuma. Ɣas akken sekkṛent tewwura, yusa-d Sidna Ɛisa, ibedd gar-asen yenna-yasen : Talwit fell-awen ! ²⁷ Imiren yenna i Ṭuma : Awi-d aḍad-ik ha-ten-an ifassen-iw, qeṛṛeb-d afus-ik tesserseḍ-t ɣef yidis-iw. Ur ttcikki yara, lameɛna amen ! ²⁸ Ṭuma irra-yas : A Ssid-iw ! Ay Illu-yiw ! ²⁹ Sidna Ɛisa inna-yas : Armi i yi-twalaḍ i tumneḍ ! Amarezg n win ara yamnen mebla ma iwala. ³⁰ Aṭas n lbeṛhanat i yexdem daɣen Sidna Ɛisa zdat inelmaden-is, ur d-temmeslay ara fell-asen tektabt-agi. ³¹ Lameɛna ayen akk i d-ittwajemɛen deg-s yura-d i wakken ad tamnem d akken d Ɛisa i d Lmasiḥ, d Mmi-s n Yillu yerna ma tumnem s yis ad tesɛum tudert s yisem-is.

⁵⁰ Sidna Ɛisa yewwi inelmaden-is armi d lejwahi n taddart n Bitanya. Irfed ifassen-is, iburek-iten. ⁵¹ Di teswiɛt-nni yemfaṛaq yid-sen, ittwarfed ɣer igenni, ⁵² ma d nutni ɣlin ɣef tgecrar, ttḥemmiden-t ; imiren uɣalen ɣer temdint n Urucalim s lfeṛḥ.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.