D acu-ten lewɛud-is i wid i t-ittebbaɛen?

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Zik-nni, tellam am wid immuten ɣef ddemma n tuccḍa-nwen akked ddnubat-nwen ; ² tettɛicim di ddnub, tewwi-kkun ddunit, tḍefrem cciṭan, sselṭan n ddunit-agi i yettkellixen ar tura wid ur nḍuɛ ara Illu. ³ Nekni daɣen, zik-nni am nutni i nella ; nettabaɛ ixemmimen-nneɣ, ccehwat-nneɣ, nxeddem lebɣi n tnefsit-nneɣ, nella nuklal urrif n Yillu am wiyaḍ. ⁴ Lameɛna imi yeččuṛ Yillu d ṛṛeḥma, yerna leḥmala-ines ɣuṛ-neɣ d tameqqrant, ⁵ yerra-yaɣ-d ɣer tudert akked Lmasiḥ, nekni yellan am wid immuten ɣef sebba n ddnubat-nneɣ. S ṛṛeḥma n Yillu i tettwasellkem. ⁶ S tdukli-nneɣ akked Ɛisa Lmasiḥ, Illu isseḥya-yaɣ-d akked Lmasiḥ yerna yesɣim-aɣ yid-s deg igenwan, ⁷ i wakken di leqrun i d-iteddun, ad d-tban acḥal meqqrit ṛṛeḥma-ines akked leḥnana-s i aɣ-d-isbeggen s Ɛisa Lmasiḥ. ⁸ S ṛṛeḥma n Yillu kan i tettwasellkem, mi tumnem. Ayagi mačči d ayen i d-ikkan sɣuṛ-wen lameɛna d tikci n Yillu. ⁹ Mačči s lḥasanat-nwen i tettwasellkem akken yiwen ur ittzuxxu s yiman-is ; ¹⁰ axaṭer ayen i nella tura sɣuṛ Yillu i aɣ-d-ikka, ixleq-aɣ-d di Ɛisa Lmasiḥ i wakken ad nexdem di tudert-nneɣ lecɣal yelhan i d-ihegga si tazwara.

¹ Tura imi nuɣal d iḥeqqiyen s liman, ters-d lehna gar-aɣ d Yillu s Ssid-nneɣ Ɛisa Lmasiḥ. ² Yis daɣen i nufa abrid s liman ɣer ṛṛeḥma-agi deg i nella tura. Lfeṛḥ-nneɣ, d asirem nesɛa d akken ad ntekki di lɛaḍima n Yillu. ³ Ula di lmeḥnat, nettili di lfeṛḥ axaṭer neẓra lmeḥna tettawi-d ṣṣber, ⁴ ṣṣber isseǧhad deg ujeṛṛeb, lǧehd deg ujeṛṛeb ittawi-d asirem. ⁵ Asirem-agi ulac deg-s lexdeɛ, axaṭer leḥmala n Yillu teẓẓa deg ulawen-nneɣ s Ṛṛuḥ imqeddes i aɣ-d-ittunefken.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.