D acu i ɣ-d-yeqqar ad t-nxeddem?

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹⁶ Ḥdac-nni n inelmaden ṛuḥen ɣer tmurt n Jlili, ɣer wedrar-nni anda i sen-inna Sidna Ɛisa ad mlilen. ¹⁷ Mi t-walan seǧǧden zdat-s, meɛna kra deg-sen mazal ccukten. ¹⁸ Sidna Ɛisa iqeṛṛeb ɣuṛ-sen, inna-yasen : Tettunefk-iyi-d tezmert ama di lqaɛa ama deg igenwan. ¹⁹ Ṛuḥet ɣer tmura meṛṛa n ddunit, slemdet imdanen i wakken ad uɣalen d inelmaden-iw, ad ttwiɣeḍsen s yisem n Ubabat, n Umemmit akked Ṛṛuḥ imqeddes. ²⁰ Slemdet-asen ad xedmen ayen akk i wen-slemdeɣ. Ma d nekk ad iliɣ yid-wen yal ass alamma d taggara n ddunit.

³ Mi d-iḥya si gar lmeyytin, i nutni daɣen iwumi i d-isban iman-is d akken yedder ; ṛebɛin wussan netta ittban-asen-d yerna ittmeslay-asen-d ɣef wayen iɛnan tagelda n Yillu. ⁴ Yiwen wass, mi yella itett yid-sen, ifka-yasen lameṛ-agi : Ur tteffɣet ara si temdint n Urucalim, lameɛna ṛǧut lemɛahda n Ubabat, tin akken i wen-d-nniɣ ; ⁵ Yeḥya isseɣḍas imdanen deg aman, ma d kunwi, di kra n wussan ad tettwiɣeḍsem s Ṛṛuḥ imqeddes. ⁶ Mi llan yimceggɛen nnejmaɛen yid-s, steqsan-t : A Sidi, deg ussan-agi ara d-terreḍ tagelda i wegdud n wat Isṛail ? ⁷ Yerra-yasen : Ur ttnadit ara ad teẓrem lewqat d wussan i ihegga Baba s leḥkem-ines. ⁸ Kunwi ad wen-d-tettunefk tezmert n Ṛṛuḥ imqeddes ara d-irsen fell-awen, imiren ad tilim d inagan-iw di temdint n Urucalim, di tmurt n Yahuda d tmurt n Samarya, ad tawḍem alamma d ixfawen n ddunit.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.