Inelmaden ttwaɛfun

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

³⁶ Yiwen ufarizi yusa-d ad iɛreḍ Sidna Ɛisa ad ičč ɣuṛ-s. Sidna Ɛisa, ikcem ɣer wexxam-is, iqqim ad ičč. ³⁷ Tella yiwet n tmeṭṭut tucmitt di taddart-nni, mi tesla s Sidna Ɛisa yella deg wexxam n ufarizi-nni, tekcem tewwi yid-s tabuqalt n leɛṭer. ³⁸ Tekka-d deffir Sidna Ɛisa, teɣli ɣer iḍarren-is tettru. Tesselxes iḍarren n Sidna Ɛisa s yimeṭṭawen-is, tesfeḍ-iten s ucebbub-is, tessudun-iten yerna tdehhin-iten s leɛṭer-nni. ³⁹ Afarizi-nni mi iwala annect-nni, ixemmem deg iman-is inna : Lemmer argaz-agi d nnbi i yella, yili yeɛqel d akken tameṭṭut-agi i t-ittnalen d yir tameṭṭut i tella. ⁴⁰ Sidna Ɛisa yenna i ufarizi-nni : A Semɛun ! Bɣiɣ ad ak-d-iniɣ yiwen wawal ! Afarizi yerra-yas-d : Ini-d a sidi ! ⁴¹ Sidna Ɛisa yenna-yas : Illa yiwen umṭalbu ittalas i sin yirgazen, yiwen ittalas-as xems meyya n iṣurdiyen, i wayeḍ xemsin. ⁴² Imi ur sɛin ara i sin s wacu ara xellṣen, isemmeḥ-asen. Anwa deg-sen ara t-iḥemmlen akteṛ ? ⁴³ Semɛun afarizi yerra-yas : Cukkeɣ d win iwumi i isumeḥ ṭṭlaba tameqqrant. Sidna Ɛisa yenna-yas : Tesɛiḍ lḥeqq ! ⁴⁴ Dɣa iwehha ɣer tmeṭṭut-nni, yenna i Semɛun : Twalaḍ tameṭṭut-agi ? Kecmeɣ-d ɣer wexxam-ik, ur iyi-d-tefkiḍ ara aman ad ssirdeɣ iḍarren-iw, nettat tessared-iten s yimeṭṭawen-is terna tesfeḍ-iten s ucebbub-is. ⁴⁵ Kečč ur d-tsellmeḍ ara fell-i, nettat seg mi i d-tekcem tessudun deg iḍarren-iw. ⁴⁶ Kečč ur tedhineḍ ara aqerruy-iw s zzit, ma d nettat tesmar-d leɛṭer ɣef iḍarren-iw. ⁴⁷ Ad ak-iniɣ : Ddnubat-is meṛṛa ttwaɛfan-as daymi i d-tbeggen leḥmala tameqqrant. Ma d win iwumi yettwaɛfa ciṭṭuḥ, leḥmala-ines d tamecṭuḥt. ⁴⁸ Sidna Ɛisa yenna i tmeṭṭut-nni : Atan ttwaɛfan-am ddnubat-im ! ⁴⁹ Inebgawen nniḍen bdan qqaren deg iman-nsen : D acu-t wergaz-agi i yessawḍen iman-is ad iɛfu ula d ddnubat ? ⁵⁰ Sidna Ɛisa yenna i tmeṭṭut-nni : Liman-im isellek-ikem, ṛuḥ di talwit.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

D acu i d-nelmed si teqṣiḍt-agi ɣef wamek ara nili d inelmaden?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.