Inelmaden d arraw n Ṛebbi

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

³ Ad ittubarek Yillu, Baba-s n Ssid-nneɣ Ɛisa Lmasiḥ, i aɣ-d-ifkan deg igenwan mkul lbarakat n Ṛṛuḥ imqeddes, s Ɛisa Lmasiḥ. ⁴ Yis i aɣ-d-ixtaṛ Yillu uqbel ad d-ixleq ddunit, i wakken ad nili zdat-s d izedganen mebla lɛib. ⁵ Illu iḥemmel-aɣ, daymi i yeqsed si zik s lebɣi-ines ad aɣ-irr d arraw-is s Ɛisa Lmasiḥ, ⁶ i wakken ad t-neḥmed ad t-ncekkeṛ ɣef ṛṛeḥma-s tameqqrant i aɣ-d-ifka s Mmi-s ɛzizen. ⁷ S lmut n Sidna Ɛisa i aɣ-d-icufeɛ, s idammen-is yuzzlen i aɣ-ttwaɛfan ddnubat-nneɣ ; s wakka isbeggen-aɣ-d acḥal meqqret ṛṛeḥma-ines ⁸ i d-issers fell-aɣ s waṭas, yerna ifka-yaɣ-d lefhama d tmusni.

²⁶ Axaṭer tuɣalem akk d arraw n Yillu s liman di Ɛisa Lmasiḥ. ²⁷ Kunwi akk ittwaɣeḍsen s yisem n Lmasiḥ, tettɛicim tudert tamaynut yellan di Lmasiḥ. ²⁸ Ulac la asṛayli la Ayunani, la akli la ilelli, la argaz la tameṭṭut, axaṭer kunwi akk d yiwen di Ɛisa Lmasiḥ. ²⁹ Yerna ma tellam d ayla n Lmasiḥ, aql-ikkun si dderya n Ibrahim, d iwṛiten akken yella di lweɛd.

¹ Atah wayen i bɣiɣ ad t-id-iniɣ : Skud win ara iweṛten mazal-it meẓẓi, ur imxalaf ara netta d win yellan d akli, ɣas akken d netta ara yuɣalen d bab n kullec ; ² lameɛna ilaq-as ad yaɣ awal i wid ittelhayen yid-s, iseddayen lecɣal-is, alamma yessaweḍ leɛmeṛ akken i d-iweṣṣa baba-s. ³ Akken daɣen ula d nekni asmi nella meẓẓiyit, nɛac seddaw leḥkem n leqwanen n ddunit, ⁴ meɛna asmi i d-iwweḍ lweqt i aɣ-iwɛed Yillu, iceggeɛ-d Mmi-s i d-ilulen si tmeṭṭut, iɛac seddaw leḥkem n usaḍuf, ⁵ i wakken ad d-ifdu wid yellan seddaw leḥkem n usaḍuf, i wakken ad nuɣal d arraw-is. ⁶ Tura imi nuɣal d arraw n Yillu, ifka-yaɣ-d ɣer ulawen-nneɣ Ṛṛuḥ n Mmi-s s wayes i nessawal : Abba ! Yeɛni : A Baba ! ⁷ S wakka, ikkes fell-awen uzaglu n tkelwa, tuɣalem seg warraw-is ; ma tellam seg warraw-is, d kunwi ara iweṛten ayen i wen-iwɛed Yillu s ṛṛeḥma-ines.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

D acu i d-nelmed si teqṣiḍt-agi ɣef wamek ara nili d inelmaden?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.