Inelmaden ttnadin ɣef Baba-tneɣ

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Yiwen wass, yella Sidna Ɛisa yettẓalla deg yiwen wemkan. Mi ifukk, yiwen seg yinelmaden-is inna-yas : A Sidi, sselmed-aɣ amek ara neẓẓall akken isselmed Yeḥya i yinelmaden-is. ² Inna-yasen : Mi ara tettẓallam, init : A Baba-tneɣ, ad ittwiqeddes yisem-ik, ad d-tas tgeldit-ik, ³ efk-aɣ-d yal ass aɣṛum-nneɣ, ⁴ semmeḥ-aɣ ddnubat-nneɣ, imi nettsamaḥ ula d nekni i wid i aɣ-iḍelmen, ur aɣ-ttaǧǧa ara ad neɣli deg ujeṛṛeb. ⁵ Inna-yasen daɣen : Ma yesɛa yiwen deg-wen aḥbib, iṛuḥ ɣuṛ-s di ttnaṣfa n yiḍ ad as-yini : Ay aḥbib rḍel-iyi-d tlata teḥbulin n weɣṛum, ⁶ atan yusa-yi-d yiwen weḥbib i yeṭṭef webrid, ur sɛiɣ d acu ara as-d-sserseɣ. ⁷ Ma yerra-yas-d si zdaxel n wexxam : Ur iyi-ttɛettib ara, tawwurt tsekkeṛ, nekk d warraw-iw aql-aɣ neṭṭes, ur zmireɣ ara ad d-kkreɣ i wakken ad ak-d-fkeɣ aɣṛum. ⁸ Ad wen-d-iniɣ : Ma yeɛdez ur ibɣi ara ad d-ikker ɣuṛ-s ɣas akken d aḥbib-is, ad d-ikker ad as-d-ifk ayen akk i as-issuter axaṭer yusa-d ɣuṛ-s di ttnaṣfa n yiḍ iṛẓa-yas aqerruy-is. ⁹ Ma d nekk nniɣ-awen : Ssutret ad wen-d-ittunefk, qellbet ad tafem, sṭebṭebet ad wen-d-ldin. ¹⁰ Axaṭer kra n win issuturen ad as-d-ittunefk, win ittqelliben ad yaf, win isṭebṭuben ad as-d-ldin. ¹¹ Anwa deg-wen ara yefken i mmi-s adɣaɣ ma yessuter-as aɣṛum ? Neɣ ad as-ifk azrem ma yessuter-as aslem ? ¹² Neɣ ma yessuter-as tamellalt ad as-ifk tiɣirdemt ? ¹³ Ma yella kunwi yellan d imcumen tessnem ad tefkem ayen ilhan i warraw-nwen, amek Baba-twen yellan deg igenni ur d-ittak ara Ṛṛuḥ imqeddes i wid i as-t-issuturen ?

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

D acu i d-nelmed si teqṣiḍt-agi ɣef wamek ara nili d inelmaden?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.