Inelmaden ṭṭaɛen Yasuɛ yerna t-ṣeggiden imdanen

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Yiwen wass, yella Sidna Ɛisa ɣef rrif n ugelmim n Ǧinizarit. Lɣaci meṛṛa zzin-as-d, mčuččaɛen-d akken ad slen i wawal n Yillu. ² Iwala snat n teflukin rrif n yilel, iḥewwaten rsen-d i wakken ad ssirden icebbaken-nsen. ³ Sidna Ɛisa yuli ɣer yiwet si teflukin-nni, tin yellan n Semɛun, inna-yas ad ibɛed acemma ɣef rrif. Iqqim, ibda yesselmad-d lɣaci syenna. ⁴ Mi ifukk aselmed inna i Semɛun : Sbeɛdet taflukt ɣer wemkan lqayen, tḍeggrem icebbaken-nwen ad tṣeggdem. ⁵ Semɛun inna-yas : A Sidi, iḍ kamel nekni d aṣegged ur d-neṭṭif acemma ; lameɛna ɣef wawal-ik ad nexdem akken i d-tenniḍ, ad nḍegger icebbaken. ⁶ Mi xedmen akken i sen-inna Sidna Ɛisa, ṭṭfen-d aṭas n iselman, armi qṛib ad qqerṣen icebbaken-nsen. ⁷ Ssawalen, ttwehhin i yimeddukal-nsen yellan di teflukt nniḍen ad d-asen ad ten-ɛiwnen. Mi d-usan, ččuṛen snat-nni n teflukin armi qṛib ad ɣerqent. ⁸ Semɛun-Buṭrus, mi iwala ayagi, yuɣal ɣef tgecrar zdat n Sidna Ɛisa, yenna-yas : Beɛɛed fell-i a sidi axaṭer d amednub i lliɣ. ⁹ Ikcem-it lxuf netta d wid yellan yid-s, dehcen imi i d-ṭṭfen annect-nni n iselman. ¹⁰ Ula d Yaɛqub akked Yuḥenna, arraw n Zabadi yellan d imeddukal n Semɛun wehmen. Dɣa yenna Sidna Ɛisa i Semɛun : Ur ttaggad ara, sya d asawen mačči d iselman ara d-ttṣeggideḍ, meɛna d imdanen. ¹¹ Imiren rran-d tiflukin-nsen ɣer rrif, ǧǧan kullec dinna, ddan d Sidna Ɛisa.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

D acu i d-nelmed si teqṣiḍt-agi ɣef wamek ara nili d inelmaden?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.