Inelmaden t-qadaren yerna ttawin-d lɣella di Yasuɛ

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Nekk, d tara n tidett, yerna d Baba i tt-ixeddmen. ² Yal isegmi yeṭṭfen deg-i ur d-nettak ara lfakya, igezzem-it, ma d isegman i d-ittaken lfakya, iferres-iten akken ad d-fken lfakya s waṭas. ³ Akka ula d kunwi i teṣfam s uselmed i wen-d-fkiɣ. ⁴ Ilit deg-i, nekk ad iliɣ deg-wen. Isegmi ur izmir ara ad d-ifk lfakya weḥd-s ma ur iṭṭif ara ɣer tara. Akken daɣen kunwi, ma ur teṭṭifem ara deg-i ur tettizmirem ara ad d-tefkem lfakya. ⁵ Nekk d tara, kunwi d isegman-is. Win yellan deg-i nekk lliɣ deg-s, ad d-ifk lfakya s waṭas, axaṭer mebla nekk ur tettizmirem ad txedmem acemma. ⁶ Win ur neṭṭif ara deg-i ad ittwiḍegger ɣer beṛṛa n tfeṛṛant am isegmi yettwagezmen. Mi ara qqaren isegman, ad ttwijemɛen i wakken ad sen-ceɛlen times ad ṛɣen. ⁷ Ma teṭṭfem deg-i yerna awal-iw izdeɣ deg-wen, ssutret ayen i tebɣam ad kkun-id-yaweḍ. ⁸ Ma tettakem-d lfakya s waṭas, tesbegginem-d d akken d tidett d inelmaden-iw i tellam ; akka ara d-tban tmanegt n Baba i yimdanen. ⁹ Akken i yi-iḥemmel Baba i kkun-ḥemmleɣ ula d nekk ; dumet di tayri-inu. ¹⁰ Ma tḥerzem lumuṛat-iw ad tdumem di tayri-w, akken ḥerzeɣ lumuṛ n Baba yerna dumeɣ di tayri-s. ¹¹ Nniɣ-awen-d akk ayagi i wakken lfeṛḥ-iw ad kkun-yeččaṛ ula d kunwi, dɣa lfeṛḥ-nwen ad innekmal. ¹² Atan ihi lameṛ ara wen-d-fkeɣ : Myeḥmalet wway gar-awen akken i kkun-ḥemmleɣ nekkini. ¹³ Ulac tayri yugaren tin n win ara isebblen tudert-is ɣef yeḥbiben-is. ¹⁴ Aql-ikkun d iḥbiben-iw ma txeddmem ayen i wen-d-umṛeɣ. ¹⁵ Sya ɣer zdat ur kkun-ḥettbeɣ ara d iqeddacen, axaṭer aqeddac ur iẓri ara d acu i ixeddem Bab-is. Tura aql-ikkun d iḥbiben-iw axaṭer slemdeɣ-awen ayen akk i d-lemdeɣ ɣer Baba. ¹⁶ Mačči d kunwi i yi-xtaṛen meɛna d nekk i kkun-ixtaṛen ; ceggɛeɣ-kkun i wakken ad d-tefkem lfakya, lfakya ara idumen. S wakka, Ababat ad wen-yefk ayen akk ara as-tessutrem s yisem-iw. ¹⁷ Atan ihi lameṛ ara wen-d-fkeɣ : Myeḥmalet wway gar-awen.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

D acu i d-nelmed si teqṣiḍt-agi ɣef wamek ara nili d inelmaden?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.