Inelmaden ddren s Ṛṛuḥ

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Ihi ass n lḥisab ulac lɛiqab ɣef wid yumnen s Ɛisa Lmasiḥ. ² Axaṭer asaḍuf n Ṛṛuḥ n tudert di Ɛisa Lmasiḥ isellek-iyi seg usaḍuf n ddnub akked lmut. ³ Ṭawrat n Musa ur tezmir ara ad teɣleb ddnub axaṭer ṭṭbiɛa-nneɣ tekkes-as tazmert. Ayen akken ur tezmir ara ṭawrat n Musa ad t-texdem, d ayen i yexdem Yillu mi d-iceggeɛ Mmi-s s ṣṣifa n wemdan, i d-yusan s tfekka am tin n yimdanen yellan meṛṛa d imednuben, i wakken ad ifk iman-is d asfel s wayes ara yeḥkem ɣef ddnub i ten-izedɣen. ⁴ S wakka ihi ara yettwakemmel deg-neɣ wayen i d-tenna ṭawrat n Musa, nekni yettɛicin s tezmert n Ṛṛuḥ imqeddes mačči s ṭṭbiɛa-nneɣ. ⁵ Wid ittɛicin s ṭṭbiɛa n wemdan ttqelliben kan ɣef wayen iɛnan lebɣi n wemdan, ma d wid ittɛicin s Ṛṛuḥ imqeddes ttqelliben ɣef wayen iɛnan lebɣi n Ṛṛuḥ imqeddes. ⁶ Wid ittɛicin s ṭṭbiɛa n wemdan tteddun ɣer lmut, ma d wid ittɛicin s lebɣi n Ṛṛuḥ imqeddes tteddun ɣer tudert d lehna. ⁷ Axaṭer wid ittabaɛen lebɣi n wemdan uɣalen d iɛdawen n Yillu, imi ur ḍuɛen ara asaḍuf-ines, axaṭer ṭṭbiɛa n wemdan ur tezmir ara ad tḍuɛ asaḍuf n Yillu. ⁸ Wid temlek ṭṭbiɛa-nsen ulamek ara ɛeǧben i Yillu. ⁹ Ma d kunwi mačči s ṭṭbiɛa n wemdan i tetteddum lameɛna tetteddum s lebɣi n Ṛṛuḥ imqeddes axaṭer Ṛṛuḥ n Yillu izdeɣ deg-wen. Win deg ur izdiɣ ara Ṛṛuḥ n Lmasiḥ ur illi ara d ayla-s. ¹⁰ Ma yella Lmasiḥ deg-wen, ɣas ad temmet tfekka ɣef sebba n ddnub, ṛṛuḥ-nwen ad yidir ɣef ddemma n lḥeqq. ¹¹ Ma yezdeɣ deg-wen Ṛṛuḥ n Yillu i d-isseḥyan Sidna Ɛisa si gar lmeyytin, win i d-isseḥyan Sidna Ɛisa si gar lmeyytin, izmer daɣen s Ṛṛuḥ-is izedɣen deg-wen, ad d-yerr tudert i tfekka-nwen ara yemmten. ¹² S wakka ihi ay atmaten, nettwalas lameɛna mačči ɣer lebɣi n ṭṭbiɛa-nneɣ, ur ilaq ara ad nidir akken tebɣa tfekka-nneɣ. ¹³ Ma tettidirem s lebɣi n tfekka-nwen atan ad temmtem, lameɛna ma tɣelbem lebɣi n ṭṭbiɛa-nwen s Ṛṛuḥ imqeddes, ad tidirem. ¹⁴ Axaṭer wid itteddun s Ṛṛuḥ n Yillu, d arraw n Yillu. ¹⁵ Ṛṛuḥ i wen-d-ittunefken mačči d Ṛṛuḥ ara kkun-irren d aklan i wakken ad tɛicem di tuggdi, meɛna d Ṛṛuḥ imqeddes i kkun-irran d arraw n Yillu, s yis i nezmer ad nessiwel i Yillu : A baba-tneɣ ! ¹⁶ D Ṛṛuḥ imqeddes s yiman-is i d-iwekkden i ṛṛuḥ-nneɣ d akken nekni d arraw n Yillu. ¹⁷ Ihi ma yella d arraw-is i nella, d nekni daɣen i d iwṛiten : D iwṛiten n Yillu, d iwṛiten akked Lmasiḥ, meɛna ma nenɛettab yid-s, i wakken ad nili daɣen yid-s di tmanegt-is. ¹⁸ Ihi leɛtab i nesɛedday tura, ur nezmir ara ad t-nmettel ɣer tmanegt ara d-ibeggen Yillu deg-neɣ.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

D acu i d-nelmed si teqṣiḍt-agi ɣef wamek ara nili d inelmaden?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.