Timezgida d tafekka n Lmasiḥ

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹² Tafekka n wemdan d yiwet, ɣas akken tesɛa aṭas n iselqam. Iselqam-agi ɣas deg waṭas yid-sen, d yiwet n tfekka i llan ; akken daɣen i yella Lmasiḥ. ¹³ Axaṭer s yiwen n Ṛṛuḥ kan i nettwaɣḍes meṛṛa i wakken ad nili d yiwet n tfekka ; ama d at Isṛail neɣ d iyunaniyen, ama d aklan neɣ d iḥeṛṛiyen, seg yiwen n Ṛṛuḥ i neswa meṛṛa. ¹⁴ Tafekka ur tebni ara ɣef yiwen n uselqim, lameɛna tebna ɣef waṭas n iselqam. ¹⁵ Ma yenna-d uḍar : Imi ur lliɣ ara d afus, ur ttekkiɣ ara di tfekka, ɛni d annect-nni ara t-irren ur ittekki ara di tfekka ? ¹⁶ Ma yenna-d umeẓẓuɣ : Imi mačči d tiṭ i lliɣ ur ttekkiɣ ara di tfekka, ɛni d annect-nni ara t-irren ur ittekki ara di tfekka ? ¹⁷ Ma yella tafekka meṛṛa d tiṭ, amek ara tili tmesliwt ? Neɣ ma yella d ameẓẓuɣ kan i tella, amek ara yili wesriḥi ? ¹⁸ Illu, ibna mkul aselqim di tfekka akken i as-ihwa. ¹⁹ Ma yella tafekka meṛṛa d yiwen n uselqim, anda-tt ihi tafekka ? ²⁰ S wakka ihi aṭas n iselqam i yellan, meɛna tafekka yiwet. ²¹ Tiṭ ur tezmir ara ad tini i ufus : Ur ak-uḥwaǧeɣ ara ! Aqerruy ur izmir ara ad yini i uḍar : Ur ak-uḥwaǧeɣ ara. ²² Iselqam-nni n tfekka i d-ittbanen d imecṭaḥ, nefɛen aṭas. ²³ Iselqam n tfekka iwumi ur nefki ara lqima, d nutni i nettḥadar akteṛ n wiyaḍ ; ihi d iselqam ur nezmir ara ad d-nebder i nettḥadar aṭas, ²⁴ ma d wid yesɛan lqima, ur uḥwaǧen ara lemḥadra. Illu, ibna tafekka akken ara izegged lqima i yiselqam ixuṣṣen, ²⁵ i wakken ur d-ittili ara lxilaf gar iselqam, meɛna ad ttemḥadaren wway gar-asen. ²⁶ Ma yella yiwen n uselqim ittwaqṛeḥ, wiyaḍ meṛṛa ad ttwiqeṛḥen yid-s ; ma ittunefk-as ccan i wayeḍ, wiyaḍ akk ad feṛḥen yid-s. ²⁷ Kunwi meṛṛa d tafekka n Lmasiḥ, yal yiwen deg-wen d aselqim di tfekka-s, mkul yiwen deg umkan-is. ²⁸ Isbedd Yillu di tmezdayt, tazwara imceggɛen, mbeɛd lanbiya, mbeɛd iselmaden, mbeɛd wid yesɛan tikci n lbeṛhanat, tikci i wakken ad sseḥlun imuḍan, wid yettɛawanen, imḍebbren d wid yettmeslayen s tutlayin ur nettwassen ara. ²⁹ Ɛni d imceggɛen meṛṛa ? Neɣ d lanbiya meṛṛa ? Sselmaden meṛṛa ? Xeddmen meṛṛa lbeṛhanat ? ³⁰ Ɛni sɛan meṛṛa tikci n useḥlu, neɣ ttmeslayen meṛṛa timeslayin ur nettwassen ara ? Neɣ zemren akk ad d-sfehmen timeslayin-agi ? ³¹ Ihi ad wen-d-iniɣ : Nadit axir ɣef tikciwin-nni inefɛen aṭas. Ad wen-d-mleɣ tura abrid yifen akk iberdan.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed si teqṣiḍt-agi ɣef wamek ara nili d timezgida?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.