Timezgida tqeddec wa ɣef wa

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

⁴² Issawel-asen Sidna Ɛisa yenna-yasen : Twalam ayen iḍerrun di ddunit : Wid nettwali d igelliden akked d imeqqranen n yigduden ttqehhiṛen lɣaci-nsen yerna ḥekkmen fell-asen s zzuṛ ! ⁴³ Ur ilaq ara ad yili wannect-a gar-awen. Meɛna win yebɣan ad yili d ameqqran gar-awen ilaq ad yuɣal d aqeddac-nwen. ⁴⁴ Win yebɣan daɣen amkan amezwaru, ilaq ad yili d aqeddac-nwen meṛṛa. ⁴⁵ Axaṭer Mmi-s n wemdan ur d-yusi ara i wakken ad qedcen fell-as wiyaḍ, meɛna d netta ara iqedcen fell-asen, yerna ad ifk tudert-is d asfel ɣef waṭas n yimdanen.

⁴ Llan aṭas n leṣnaf n tikciwin n Ṛebbi, lameɛna yiwen n Ṛṛuḥ kan i yellan ; ⁵ aṭas n leṣnaf n leqdic i yellan meɛna yiwen n Yillu i nesɛa ; ⁶ aṭas n leṣnaf n lecɣal i yellan, meɛna Illu d yiwen, d netta i ten-isedduyen akk deg-neɣ meṛṛa. ⁷ Yal yiwen tettunefk-as-d tikci n Ṛṛuḥ imqeddes i nnfeɛ-nneɣ meṛṛa. ⁸ Ihi Ṛṛuḥ imqeddes ifka-d i yiwen ad immeslay s ṣṣwab d lefhama, ifka-d i wayeḍ ad immeslay s tmusni. ⁹ Ṛṛuḥ-agi yefka daɣen i wayeḍ liman iǧehden, i wayeḍ tazmert s wayes ara yesseḥlu imuḍan ; ¹⁰ ifka daɣen i wayeḍ tazmert ad ixdem lbeṛhanat, wayeḍ ad ittxebbiṛ sɣuṛ Yillu ; wayeḍ daɣen ifka-yas-d tazmert s wayes ara yeɛqel ayen i d-ittasen sɣuṛ Ṛṛuḥ imqeddes d wayen i d-ittasen sɣuṛ leṛwaḥ n diri ; wayeḍ ittunefk-as-d ad immeslay timeslayin ur nettwassen ara ; wayeḍ daɣen ittunefk-as-d ad d-issefhem timeslayin-agi ur nettwassen ara. ¹¹ Ayagi akk itekk-d seg yiwen n Ṛṛuḥ. Ṛṛuḥ imqeddes ittak-d ayagi meṛṛa akken ibɣa, i yal yiwen deg-neɣ.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed si teqṣiḍt-agi ɣef wamek ara nili d timezgida?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.