D acu i xeddmen imḍebbṛen yelhan?

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Ad nhuɣ tura imṛayen di liman yellan gar-awen. Nekk yellan d amṛay am nutni, nekk iḥedṛen i leɛtab n Lmasiḥ, ittekkan di tmanegt-is ara d-ibanen ; ad ten-weṣṣiɣ : ² Ḥadret taqeḍɛit ɣef i kkun-iwekkel Yillu ; lhit yid-s s lebɣi-nwen, mačči sennig n wulawen-nwen, xedmet ayagi ɣef udem n Yillu, mačči s ṭṭmeɛ, meɛna seg ul. ³ Ur ssemɣaṛet ara iman-nwen ɣef wid i wen-d-iwekkel Yillu, meɛna ilit d lemtel ara tebɛen. ⁴ Imiren asmi ara d-iban win yellan sennig imeqqranen meṛṛa, ad wen-d-tettunefk tɛeṣṣabt n tmanegt ur nfennu. ⁵ Ula d kunwi daɣen ay ilmeẓyen, qadṛet imṛayen ! Ddut s leqdeṛ d wannuz, axaṭer Illu ur iqebbel ara wid ittzuxxun, meɛna ittak ṛṛeḥma-s i wid ittanzen. ⁶ Anzet ihi seddaw ufus iǧehden n Yillu, i wakken ad kkun-irfed di teswiɛt ilaqen. ⁷ Rret akk iɣeblan-nwen gar ifassen-is, axaṭer ittḥebbiṛ fell-awen. ⁸ Ḥadret, ɛasset iman-nwen axaṭer cciṭan aɛdaw-nwen itezzi iṛeɛɛed am yizem, ittqellib anwa ara issebleɛ. ⁹ Ur as-ttaǧǧat ara abrid, sɛut liman iǧehden, teẓrem d akken aqehheṛ-agi ittɛeddi ula ɣef atmaten-nwen di ddunit meṛṛa. ¹⁰ Mi ara tenneɛtibem kra n lweqt, Illu n mkul ṛṛeḥma, i kkun-ixtaṛen s Ɛisa Lmasiḥ i wakken ad tilim di tmanegt-is ittdumun, ad kkun-iheggi, ad kkun-iṣeggem, ad kkun-isseǧhed, i wakken ur tɣellim ara. ¹¹ I netta tazmert si lǧil ɣer lǧil. Amin !

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed seg teqṣiḍt-agi ɣef wamek ara nili d imḍebbren?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.