D acu i xeddmen yir imḍebbṛen?

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Ameɣlal ihdeṛ-iyi-d yenna-yi-d : ² Ay amdan, cir ɣef imeksawen n Isṛail ! Cir tiniḍ i yimeksawen-agi : Atan d acu i d-yenna Yillu Ameɣlal : A nnger n imeksawen n Isṛail, i d-yelhan d yiman-nsen kan ! Mačči d taqeḍɛit s wayes i d-yewwi ad d-lhin ? ³ Ttettem tassemt-ines, tettlusum taḍuṭ-ines, tzellum lmal yeṭṭuqten, lameɛna ur teksim ara taqeḍɛit. ⁴ Ur tesǧehdem ara ulli timeɛlalin, ur tduwam ara tin yuḍnen, ur tejbiṛem ara tin yerẓen, ur d-terrim ara tin iḍaɛen, ur tnudam ara ɣef tin iɛerqen ; lameɛna tqehhṛem-tent, txedmem deg-sent lbaṭel. ⁵ Ulli-inu mzerbaɛent di yal tama imi ulac ameksa, uɣalent d lqut i yiɣersiwen meṛṛa n lexla. ⁶ Ulli-inu ttmenṭarent ɣef yidurar akked tɣaltin meṛṛa ɛlayen, mzerbaɛent di tmurt meṛṛa. Yiwen ur d-ilhi s yis-sent, neɣ inuda fell-asent. ⁷ Ɣef wayagi, ḥesset-d ay imeksawen i wawal n Umeɣlal : ⁸ Ggulleɣ s yixf-iw, i d-yenna Yillu Ameɣlal, imi d ulli-inu ttwaḥewṣent, uɣalent d lqut i yiɣersiwen meṛṛa n lexla axaṭer ulac ameksa, imi imeksawen-iw ur d-lhin ara yid-sent, lhan-d d yiman-nsen mačči d tqeḍɛit-iw, ⁹ ɣef wayagi, ḥesset-d ay imeksawen i wawal n Yillu Ameɣlal : ¹⁰ Illu Ameɣlal yenna : Ad d-kkreɣ mgal imeksawen-agi ! Ad sen-d-kkseɣ ulli-inu, ur ttuɣalen ara ad ksen taqeḍɛit-iw ; ur ttuɣalen ara ad stenfɛen iman-nsen. Ad d-ssukkseɣ ulli-innu seg yimi-nsen, ur ttuɣalen ara ad tent-ččen. ¹¹ Atan d acu i d-yenna Yillu Ameɣlal : D nekk s yiman-iw ara d-yelhin d tqeḍɛit-iw, ara ibedden ɣuṛ-sent. ¹² Akken i yettnadi umeksa ɣef wulli-ines mi mzerbaɛent, ara nadiɣ ɣef wulli-inu, ad tent-id-snejmaɛeɣ seg imukan meṛṛa anda i mzerbaɛent deg wass n wagu d uɣemɣum. ¹³ Ad tent-id-ssufɣeɣ si gar yigduden, ad tent-id-jemɛeɣ si mkul tamurt, ad tent-id-rreɣ ɣer tmurt-nsent i wakken ad tent-kseɣ ɣef yidurar n Isṛail, rrif n isaffen akked imukan meṛṛa ifazen n tmurt. ¹⁴ Ad tent-kseɣ deg ilmaten yelhan, ad ttilint ɣef yidurar ɛlayen n Isṛail ; ad sgunfunt deg imukan ifazen, ad ksent deg walmaten zegzawen ɣef idurar n Isṛail. ¹⁵ D nekk ara yeksen taqeḍɛit-iw, d nekk ara tt-yawin ɣer wemkan n usgunfu, i d-yenna Yillu Ameɣlal. ¹⁶ Ad nadiɣ ɣef tin iḍaɛen, ad d-rreɣ tin iɛeṛqen, ad jebṛeɣ tin yerẓen, ad dawiɣ tin yuḍnen ; lameɛna ad kkseɣ tin yufayen d tin iǧehden. Ad kseɣ taqeḍɛit-iw s ṣṣwab.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed seg teqṣiḍt-agi ɣef wamek ara nili d imḍebbren?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.