Amedya n Yasuɛ yellan d ameksa yelhan (n ṣṣeḥ)

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Sidna Ɛisa yenna : S tidett ad wen-d-iniɣ, win ur nkeččem ara si tewwurt ɣer wemṛaḥ (leɛzib) n wulli, iɛedda si ẓẓerb, winna d amakar yerna d aqeṭṭaɛ. ² Ma d win ikeččmen si tewwurt d netta i d ameksa n wulli. ³ Aɛessas n wemṛaḥ ileddi tawwurt i umeksa, ulli sellent i ṣṣut-is, issawal-asent s yismawen-nsent, issufuɣ-itent ɣer beṛṛa. ⁴ Mi yessufeɣ tid akk yellan-ines, izeggir zdat-sent, ulli ttabaɛent-tt axaṭer ssnent ṣṣut-is. ⁵ D lmuḥal ad tebɛent abeṛṛani, ad rewlent fell-as imi ur ssinent ara ṣṣut n ibeṛṛaniyen. ⁶ Sidna Ɛisa yenna-yasen lemtel-agi, lameɛna ur fhimen ara ayen ibɣa ad sen-yini. ⁷ Inna-yasen daɣen : S tidett qqareɣ-awen, d nekk i d tawwurt ansi ttɛeddayent wulli. ⁸ Wid meṛṛa i d-yusan uqbel-iw d imakaren d iqeṭṭaɛen. Lameɛna ulli ur sen-ḥessent ara. ⁹ D nekk i d tawwurt. Win ara ikecmen seg-i ad ittusellek : Ad ikcem ad iffeɣ akken i as-ihwa, yerna ad yaf ayen ara yečč. ¹⁰ Amakar ittas-d kan i wakken ad yaker, ad izlu, ad issenger. Nekk usiɣ-d i wakken ad fkeɣ tudert i wulli-inu, tudert s waṭas. ¹¹ D nekk i d ameksa n ṣṣeḥ. Ameksa n ṣṣeḥ ittsebbil tudert-is ɣef wulli-ines. ¹² Ma d win ur nelli ara d ameksa n wulli ur nelli ara d bab-nsent, d ameksa kan yettwaxellṣen, ireggel, ittaǧǧa ulli mi ara iwali uccen. Imiren uccen ad d-iẓdem ɣef wulli, ad yawi kra seg-sent yerna ad isserwel akk taqeḍɛit. ¹³ Argaz-agi ixeddem akka imi d ameksa kan yettwaxellṣen, ur as-tewqiɛ ara deg wulli. ¹⁴ Nekk d ameksa n ṣṣeḥ, ssneɣ ulli-inu nutenti ssnent-iyi, ¹⁵ akken i yi-issen Ubabat, i t-ssneɣ ula d nekk. Ttsebbileɣ tudert-iw ɣef wulli-inu. ¹⁶ Sɛiɣ daɣen ulli nniḍen ur nelli ara seg wemṛaḥ-agi. Tigi daɣen ilaq ad tent-id-awiɣ, ad d-ḥessent i ṣṣut-iw, s wakka ad tili anagar yiwet n tqeḍɛit s yiwen umeksa. ¹⁷ Baba iḥemmel-iyi imi ttsebbileɣ tudert-iw meɛna syin akkin ad tt-d-rreɣ. ¹⁸ Yiwen ur izmir ad iyi-ikkes tudert, ttsebbileɣ-tt s lebɣi-inu. Sɛiɣ tazmert ad tt-sebbleɣ, sɛiɣ daɣen tazmert ad tt-d-rreɣ. D wagi i d lameṛ i yi-d-ifka Baba.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed seg teqṣiḍt-agi ɣef wamek ara nili d imḍebbren?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.