Amedya n Bulus

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

⁴ Ay atmaten ɛzizen ɣer Yillu, neẓra d akken yextaṛ-ikkun. ⁵ Lexbeṛ-agi n Lxir i wen-d-newwi mačči d imeslayen kan, lameɛna s tteḥqiq i wen-d-nbecceṛ Lexbeṛ-agi n tidett, s tezmert n Ṛṛuḥ imqeddes. Teẓram amek i nedda gar-awen, asmi akken i nella ɣuṛ-wen ; nexdem ayagi i wakken ad kkun-nɛiwen di tikli-nwen. ⁶ Ula d kunwi tuɣalem tetteddum am nekni deg webrid n Ssid-nneɣ, imi di teswiɛt iweɛṛen i tqeblem awal-is s lfeṛḥ i d-ittak Ṛṛuḥ imqeddes. ⁷ S wakka tuɣalem d lemtel i wid akk yumnen, i yellan di tmura n Masidunya akked Akaya.

¹ Ay atmaten, kunwi s yiman-nwen teẓram mačči mebla lmeɛna i d-nusa ɣuṛ-wen. ² Teẓram daɣen nenneɛtab, nettwargem di temdint n Filibus, meɛna ifka-yaɣ-d Yillu laman s wayes nkemmel abecceṛ n wawal-is gar-awen ɣas akken nettwaqheṛ. ³ Lexbeṛ-agi n Lxir i wen-d-newwi ur ibni ara ɣef lekdeb neɣ ɣef tḥila d lexdeɛ. ⁴ Ijeṛṛeb-aɣ Yillu, iwala d akken yezmer ad aɣ-iwekkel Lexbeṛ n Lxir, s wakka i nettbecciṛ ; ur nettqellib ara ad neɛǧeb i yimdanen, meɛna i Yillu yessnen ulawen-nneɣ. ⁵ Teẓram d akken leɛmeṛ nemmeslay s usqizzeb neɣ neḍmeɛ kra deg yiwen, atan Yillu d inigi ! ⁶ Leɛmeṛ nqelleb ad yali ccan-nneɣ ama ɣuṛ-wen ama ɣer wiyaḍ ; ⁷ yerna lemmer nebɣi, nezmer lukan nḥettem iman-nneɣ fell-awen imi d imceggɛen n Lmasiḥ i nella ! Meɛna nekni nbeggen-d leḥnana gar-awen am tyemmatt ittḥadaren ɣef warraw-is. ⁸ Imi tellam deg wulawen-nneɣ, mačči kan d Lexbeṛ n Lxir n Yillu i nebɣa ad wen-nbecceṛ, meɛna nezmer ad nsebbel ula d tiṛwiḥin-nneɣ fell-awen, axaṭer teɛzizem fell-aɣ aṭas. ⁹ Ma tecfam ay atmaten ɣef wussan-nni mi i wen-d-newwi Lexbeṛ n Lxir n Yillu, nenneɛtab, nxeddem iḍ d wass akken ur nettili d taɛekkumt ula i yiwen deg-wen. ¹⁰ Illu yeẓra, kunwi teẓram d akken tikli-nneɣ teṣfa, nedda s lḥeqq, yiwen ur aɣ-d-issukkes lɛib gar-awen kunwi s wid yumnen. ¹¹ Teẓram daɣen nella i mkul yiwen deg-wen am ubabat ɣer warraw-is. ¹² Nenha-kkun, nesseǧhed-ikkun, nḥellel-ikkun i wakken ad teddum akken yebɣa Yillu i wen-d-issawlen ɣer tgelda-ines d lɛaḍima-s.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed seg teqṣiḍt-agi ɣef wamek ara nili d imḍebbren?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.