Lewṣayat n Bulus i yimḍebbṛen

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹⁷ Si temdint n Militus, iceggeɛ Bulus ɣer imṛayen n tmezdayt n Ifasus i wakken ad d-asen. ¹⁸ Mi d-wwḍen ɣuṛ-s, inna-yasen : Tessnem si zik tikli-inu yid-wen seg wass amezwaru mi d-kecmeɣ tamurt n Asya. ¹⁹ Qedceɣ ɣef Umeɣlal s wannuz d imeṭṭawen gar iɣeblan d lemḥayen i yi-sseṛwan wat Isṛail. ²⁰ Teẓram d akken ur ffireɣ acemma fell-awen, beccṛeɣ-awen yerna sslemdeɣ-awen ayen akk ara kkun-inefɛen, ama zdat lɣaci ama deg ixxamen-nwen. ²¹ Ttbecciṛeɣ i wat Isṛail d iyunaniyen ad d-uɣalen ɣer webrid n Yillu yerna ad amnen s Sidna Ɛisa. ²² Tura, Ṛṛuḥ imqeddes iḥreṣ-iyi ad ṭṭfeɣ abrid ɣer temdint n Urucalim, ur ẓriɣ ara d acu ara yeḍrun yid-i. ²³ Si temdint ɣer tayeḍ, Ṛṛuḥ imqeddes ittxebbiṛ-iyi-d d akken ttṛaǧun-iyi leḥbus d wussan n ddiq. ²⁴ Lameɛna tudert-iw ur as-fkiɣ ara lqima, ur tt-ḥsibeɣ ara ɛzizet fell-i ; a win yufan kan ad kemmleɣ tikli-inu akked Ṛebbi, ad xedmeɣ s lfeṛḥ ayen i yi-d-ifka Sidna Ɛisa, i wakken ad beccṛeɣ Lexbeṛ n Lxir n ṛṛeḥma n Yillu. ²⁵ Tura ẓriɣ d akken ur tettuɣalem ara ad teẓrem udem-iw, kunwi iwumi beccṛeɣ tagelda n Yillu. ²⁶ Daymi i wen-d-qqareɣ ass-agi, ma yella yiwen yeffeɣ i webrid, ddnub i yiri-s, ²⁷ imi i wen-beccṛeɣ ayen akk yellan di leqsed n Yillu, ur ffireɣ ula d acemma fell-awen. ²⁸ Ɛasset ɣef yiman-nwen, ɛasset ɣef tqeḍɛit ɣef i kkun-iwekkel Ṛṛuḥ imqeddes. Ilit d iɛessasen ɣef tmezdayt n Yillu i d-iḥeṛṛ s idammen n Mmi-s. ²⁹ Ẓriɣ d akken mi ara ṛuḥeɣ, ad d-kecmen gar-awen wuccanen iweɛṛen, wid ur nṛeḥḥem ara taqeḍɛit ; ³⁰ ad d-kkren daɣen gar-awen yirgazen ara islemden leḥwayeǧ iɛewjen i wakken ad jebden inelmaden ɣuṛ-sen. ³¹ Ɣuṛ-wat ihi, ɛasset iman-nwen ! Mmektit-d d akken azal n tlata yiseggasen, ur ḥbiseɣ am yiḍ am ass, nehhuɣ mkul yiwen seg-wen s imeṭṭawen. ³² Tura ad kkun-ǧǧeɣ gar ifassen n Yillu d ṛṛeḥma n wawal-is ; d netta i izemren ad kkun-isseǧhed, ad wen-d-ifk lweṛt i kunwi akk yellan d ayla-s. ³³ Ur ḍmiɛeɣ, la uṛeɣ la idrimen neɣ leḥwayeǧ n yiwen deg-wen. ³⁴ Teẓram s yiman-nwen d akken s ifassen-iw i xeddmeɣ i wakken ad ɛeggceɣ iman-iw akked wid yellan yid-i. ³⁵ Di mkul lḥaǧa, ssekneɣ-awen amek ara txedmem i wakken ad tɛiwnem wid ur nezmir ara. Mmektit-d imeslayen n Sidna Ɛisa mi d-inna : Win ittseddiqen ittubarek kteṛ n win iteṭṭfen ssadaqa-ni. ³⁶ Mbeɛd imeslayen-agi, yuɣal ɣef tgecrar, yedɛa yid-sen. ³⁷ Ṭṭerḍqen s imeṭṭawen, ṭṭfen-t gar iɣallen-nsen, sellmen akk fell-as ; ³⁸ ḥeznen aṭas imi i sen-d-inna : Ur tettuɣalem ara ad teẓrem udem-iw. Syenna ddan yid-s armi d lbabuṛ.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed seg teqṣiḍt-agi ɣef wamek ara nili d imḍebbren?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.