Inelmaden ttṛuḥun ɣer tmegra

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

³⁵ Sidna Ɛisa ikka-d ɣef temdinin d tudrin meṛṛa, isselmad di leǧwameɛ-nsen, ittbecciṛ Lexbeṛ n Lxir n tgelda, isseḥlay mkul aṭṭan d mkul lɛib. ³⁶ Mi iwala Sidna Ɛisa annect-nni n lɣaci ɣaḍen-t axaṭer feclen yerna ḍaɛen am ulli ur nesɛi ameksa. ³⁷ Dɣa yenna i yinelmaden-is : Tamegra meqqret, meɛna drus ifellaḥen i yellan. ³⁸ Ḥellelet ihi bab n tmegra ad d-iceggeɛ ixeddamen ɣer tmegra-s.

¹ Sidna Ɛisa issawel i tnac n inelmaden-is, ifka-yasen tazmert s wayes ara ssufuɣen leǧnun, ara sseḥluyen mkul aṭṭan d mkul lɛib.

⁵ Sidna Ɛisa iceggeɛ tnac-agi n inelmaden-is, iweṣṣa-ten : Ur ttṛuḥut ara ɣer tmura tibeṛṛaniyin, ur keččmet ara ɣer temdinin n wat Samarya ; ⁶ ṛuḥet axir ɣer wulli iḍaɛen n wat Isṛail. ⁷ Mi ara tetteddum, ttbecciṛet qqaret : Attaya tgelda n igenwan tqeṛṛeb-d ! ⁸ Sseḥlut imuḍan, sseḥyut-d lmeyytin, ssizedget wid ihelken lbeṛs, ssufɣet leǧnun. Akken i wen-d-ittunefk mebla idrimen, fket ula d kunwi mebla idrimen. ⁹ Ur ttawit yid-wen la uṛeɣ, la lfeṭṭa, la idrimen ; ¹⁰ ur ttawit yid-wen agrab neɣ sin iqendyaṛ, ur ttawit irkasen neɣ aɛekkaz, axaṭer axeddam yuklal lqut-is. ¹¹ Di yal tamdint neɣ taddart anda ara tkecmem, steqsit ma yella win ara yesṭerḥben yis-wen, qqimet ɣuṛ-s alamma tekkrem ad tṛuḥem. ¹² Mi ara tkecmem ɣer yiwen wexxam, sellmet fell-asen, ¹³ ma steṛḥben yis-wen, lehna-nwen ad ters fell-asen ; ma ur steṛḥben ara yis-wen, lehna-nwen ad teqqim ɣuṛ-wen. ¹⁴ Ma ur qbilen ara ad setṛeḥben yis-wen neɣ ad semḥessen i wawal, ffɣet seg wexxam-nni neɣ si temdint-nni, zwit ula d aɣebbar seg iḍarren-nwen. ¹⁵ Ad wen-iniɣ tidett : Ass n lḥisab, imezdaɣ n temdint-agi ad ttuɛaqben akteṛ n temdinin n Sudum akked Gumur. ¹⁶ Atan, ad kkun-ceggɛeɣ am ulli gar wuccanen, ḥeṛcet ihi am izerman, tesɛum neyya am yetbiren. ¹⁷ Ḥadret ɣef yiman-nwen, axaṭer kra n yimdanen ad kkun-sbedden ɣer ccṛeɛ ; yerna ad kkun-wwten s ujelkaḍ di leǧwameɛ-nsen. ¹⁸ Ɣef ddemma n yisem-iw, ad kkun-sbedden zdat lḥekkam akked igelliden, i wakken am nutni am at leǧnas nniḍen, ad slen s yisem-iw. ¹⁹ Mi ara kkun-ṭṭfen, ur ttḥebbiṛet ara ɣef wamek ara temmeslayem, neɣ ɣef wayen ara d-tinim, imeslayen ara d-tinim, ad wen-d-ttunefken di teswiɛt-nni kan. ²⁰ Axaṭer mačči d kunwi ara imeslayen, meɛna d Ṛṛuḥ n Baba-twen ara d-immeslayen seg-wen.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

D acu i d-nelmed si teqṣiḍt-agi ɣef wamek ara nili d inelmaden?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.