Inelmaden ṛuḥen s tezmert n Yasuɛ

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Ad tili d lejwahi n tlata n tmeddit, Buṭrus d Yuḥenna dduklen, ulin ɣer ufakan i wakken ad ẓẓallen. ² Ttawin-d mkul ass yiwen n wergaz i d-ilulen d aqudaṛ ɣer tewwurt n ufakan, tin iwumi qqaren tawwurt tucbiḥt ; ittɣimi dinna i wakken ad issuter tin n Ṛebbi i wid i ikeččmen ɣer ufakan. ³ Mi iwala Buṭrus d Yuḥenna tteddun ad kecmen, issuter-asen tin n Ṛebbi. ⁴ Buṭrus d Yuḥenna, reṣṣan allen-nsen fell-as, nnan-as : Muqel-d ɣuṛ-neɣ ! ⁵ Imuqel-iten wergaz-nni, iḍmeɛ deg-sen ad as-d-fken kra. ⁶ Dɣa inna-yas Buṭrus : Ur sɛiɣ uṛeɣ ur sɛiɣ lfeṭṭa, lameɛna ayen sɛiɣ ad ak-t-fkeɣ : S yisem n Ɛisa Lmasiḥ Anaṣari, kker telḥuḍ ! ⁷ Iṭṭef-it-id seg ufus ayeffus, issker-it-id. Imiren kan ḥlan iḍarren-is d tkeɛburin n iḍarren-is. ⁸ Ibedd ɣef yiḍarren-is, ineggez, ibda ileḥḥu. Ikcem yid-sen ɣer ufakan, ileḥḥu ittjellib, ittḥemmid Illu. ⁹ Lɣaci akk walan-t mi ileḥḥu ittḥemmid Illu. ¹⁰ Mi t-ɛeqlen qqaren : Mačči d win akken ittɣimin ɣer “tewwurt tucbiḥt” n ufakan win akken issuturen tin n Ṛebbi ? Dehcen meṛṛa, wehmen deg wayen iḍran yid-s.

⁶ Mi zegren akk tigzirt-nni, wwḍen ɣer temdint n Bafus, mlalen-d d yiwen useḥḥar n wat Isṛail i yettaran iman-is d nnbi, isem-is Barɛisa. ⁷ Ittili ɣer lḥakem Serjyus Bulus, yellan d argaz yesɛan lefhama. Serjyus iceggeɛ ɣer Barnabas d Cawul, axaṭer yebɣa ad isel i wawal n Yillu. ⁸ Meɛna Ilimas aseḥḥar-nni, (akkagi i yettwaṭerjem yisem-is s tyunanit) yettxaṣam-iten, yettnadi ad isseɛṛeq liman i lḥakem-nni. ⁹ Cawul, ittusemman daɣen Bulus, yeččuṛen d Ṛṛuḥ imqeddes, issers allen-is fell-as, ¹⁰ inna-yas : A mmi-s n cciṭan yeččuṛen d tiḥila d lexdeɛ ! Ay aɛdaw n lḥeqq ! Ar melmi ara tesseɛwajeḍ akka iberdan n ṣṣwab n Umeɣlal ? ¹¹ Tura atan ufus n Umeɣlal fell-ak : Ad teddreɣleḍ, ad teqqimeḍ kra n lweqt ur tettwaliḍ ara tafat n yiṭij. Imiren kan, Ilimas idderɣel, yeɣli-d fell-as ṭṭlam ; yeqqim isferfud, ittnadi anwa ara as-iṭṭfen afus. ¹² Lḥakem-nni mi iwala ayen yeḍran, itɛeǧǧeb deg wawal n Umeɣlal dɣa yumen.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

D acu i d-nelmed si teqṣiḍt-agi ɣef wamek ara nili d inelmaden?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.