Inelmaden kksen aqdim, lsan amaynut

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Kunwi ihi, imi i d-teḥyam akked Lmasiḥ, nadit ɣef leḥwayeǧ n igenwan anda yella Lmasiḥ i iḥekmen ɣer tama tayeffust n Yillu. ² Ttḥebbiṛet ɣef wayen yellan deg igenwan mačči ɣef wayen yellan di ddunit-agi, ³ axaṭer ɣef wayen yeɛnan ddunit temmutem, yerna tudert-nwen teffer akked Lmasiḥ deg Illu. ⁴ Mi ara d-iban Lmasiḥ yellan d tudert-nwen, kunwi daɣen ad d-tbanem yid-s. ⁵ Ɣef ddemma n wayagi, xḍut i yir tikli n ddunit-agi s wayes tetteddum zik : Leḥṛam, ayen iɛefnen, lebɣi n tnefsit, ccehwat n diri akked ṭṭmeɛ, ayagi meṛṛa am weɛbad n iṛebbiten n lekdeb. ⁶ D annect-agi i d-isseɣlayen urrif n Yillu ɣef wid i t-ittɛaṣin. ⁷ Ula d kunwi akka i tellam zik-nni mi tettɛicim di ddnub. ⁸ Meɛna tura sbeɛdet iman-nwen ɣef wannect-agi meṛṛa : Urrif, zzɛaf, ddɣel ; ḥadret ad d-ffɣen seg imawen-nwen rregmat neɣ yir lehduṛ. ⁹ Ur skiddibet ara wway gar-awen imi tura teǧǧam yir tikli-nwen n zik. ¹⁰ Tuɣalem d imaynuten, tettnernim di tmusni n Yillu i wakken ad temcabim ɣer Win i kkun-ixelqen. ¹¹ Di tudert-agi tamaynut ulac lxilaf gar wat Isṛail d leǧnas nniḍen, gar win iḍehṛen d win ur neḍhir, gar wid itqeddmen d wid ur netqeddem, neɣ gar wakli d uḥeṛṛi, imi d Lmasiḥ i yellan d kullec di mkul yiwen. ¹² Illu iḥemmel-ikkun, ixtaṛ-ikkun ad tilim d agdud-is. Sɛut ihi ṛṛeḥma deg wulawen-nwen, leḥnana, lxir, ṣṣber d wannuz. ¹³ Ttemyawit wway gar-awen, ma yella win yesɛan acetki ɣef wayeḍ msamaḥet axir wway gar-awen, akken i wen-isemmeḥ Lmasiḥ, msamaḥet ula d kunwi. ¹⁴ Nnig n wayagi meṛṛa sɛut leḥmala yellan d tin i yesdukkulen ulawen. ¹⁵ Sɛut lehna n Lmasiḥ deg ulawen-nwen i wakken ad tilim d yiwen, ḥemmdet Illu, imi ɣer lehna-agi i wen-d-issawel. ¹⁶ Awal n Lmasiḥ ad izdeɣ deg-wen s waṭas : Wa ad isselmad wa, wa ad inehhu wa s lekyasa. Cnut s wulawen-nwen i Yillu, ḥemmdet Illu s ihellilen akked ccnawi i d-ittak Ṛṛuḥ imqeddes. ¹⁷ Ama deg imeslayen ama di lecɣal ara txedmem, xedmet kullec s yisem n Ssid-nneɣ Ɛisa, s yisem-is ttḥemmidet Illu Ababat.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

D acu i d-nelmed si teqṣiḍt-agi ɣef wamek ara nili d inelmaden?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.