Inelmaden ttsamaḥen i wiyaḍ akken i sen-isammeḥ Yillu

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

²¹ Imiren Buṭrus iqeṛṛeb ɣuṛ-s inna-yas : A sidi, acḥal n tikkal i ilaq ad semmḥeɣ i gma ma yeḍlem-iyi, armi d sebɛa n tikkal ? Sidna Ɛisa irra-yas : ²² Xaṭi ! Ur ak-d-nniɣ ara alamma d sebɛa n tikkal, meɛna alamma d sebɛin iberdan sebɛa n tikkal ! ²³ Daymi, tagelda n igenwan tettemcabi ɣer yiwen ugellid yebɣan ad imḥasab netta d iqeddacen-is. ²⁴ Akken yebda leḥsab, wwin-as-d yiwen uqeddac iwumi yettalas imelyunen. ²⁵ Imi ur isɛi ara s wacu ara ixelleṣ, agellid-nni ifka lameṛ ad ten-zzenzen d aklan s netta s tmeṭṭut-is, s warraw-is d wayen akk yesɛa, i wakken ad ixelleṣ ṭṭlaba-ines. ²⁶ Aqeddac-nni yeɣli ɣer iḍarren n ugellid, iḥellel-it inna-yas : A sidi, ṣber kra wussan, ad uɣaleɣ ad ak-xellṣeɣ ayen akk i yi-tettalaseḍ. ²⁷ Imi i t-iɣaḍ aṭas, agellid-nni isumeḥ-as ṭṭlaba-ines iserreḥ-as ad iṛuḥ. ²⁸ Akken kan i d-iffeɣ uqeddac-nni immuger-d yiwen seg imeddukal-is ixeddmen yid-s, iwumi yettalas meyya n iṣurdiyen. Ikker ɣuṛ-s iṭṭef-it si temgeṛṭ iqqar-as : Err-iyi-d ayen i ak-ttalaseɣ ! ²⁹ Ameddakel-is iɣli ɣer iḍarren-is iḥellel-it, inna-yas : Ṣber kra n wussan, ad uɣaleɣ ad ak-xellṣeɣ ! ³⁰ Lameɛna ur iqbil ara ad iṣber, irra-t ɣer lḥebs, alamma tettwixelleṣ ṭṭlaba-ines. ³¹ Iqeddacen nniḍen mi walan ayen yeḍran, iɣaḍ-iten lḥal, dɣa ṛuḥen ssawḍen lexbeṛ i ugellid. ³² Agellid iceggeɛ ɣer uqeddac-nni akken ad d-yas, dɣa inna-yas : A yir amdan ! Mi tettḥellileḍ deg-i, ɛni ur ak-sumḥeɣ ara akk ṭṭlaba-inek ? ³³ Acuɣer ihi ur as-tsumḥeḍ ara i umeddakel-ik akken i ak-sumḥeɣ nekkini ? ³⁴ Agellid-nni izɛef aṭas, yerra aqeddac-nni ɣer lḥebs, i wakken ad inɛettab alamma tettwaxelleṣ ṭṭlaba-ines. ³⁵ Akken daɣen ara wen-ixdem Baba yellan deg igenwan, ma ur tettsamaḥem ara i watmaten-nwen seg ul.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

D acu i d-nelmed si teqṣiḍt-agi ɣef wamek ara nili d inelmaden?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.