Timezgida d ayla n Ṛebbi

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Ay atmaten, ur ufiɣ ara amek ara wen-mmeslayeɣ am akken ttmeslayeɣ i yimdanen yesɛan Ṛṛuḥ imqeddes, meɛna mmeslayeɣ-awen am yimdanen n ddunit, am wid yellan d arrac deg ubrid n Lmasiḥ. ² Fkiɣ-awen ayefki mačči d aɣṛum axaṭer aɣṛum ur as-tezmirem ara, yerna ar tura ur as-tezmirem ara, mazal-ikkun tettɛicim s lebɣi n tnefsit-nwen. ³ Imi mazal gar-awen tismin d umceččew, tbeggnem-d d akken mazal-ikkun tettɛicim s lɛeqliya-nwen yerna tleḥḥum am yimdanen n ddunit. ⁴ Mi ara yini yiwen deg-wen : Nekk ddiɣ d Bulus, wayeḍ ad yini : Nekk ttekkiɣ d Abulus ; ɛni ayagi mačči d lɛeqliya n ddunit ? ⁵ D acu-t Abulus, d acu-t Bulus ? D iqeddacen kan i kkun-id-iwwin ad tamnem s Lmasiḥ ! Yal yiwen deg-neɣ ixeddem ayen i as-d-ifka Yillu ad t-ixdem. ⁶ Nekk ẓẓiɣ imɣi, Abulus issew-it, meɛna d Illu i t-issegman. ⁷ Ihi mačči d win itteẓẓun neɣ d win yesswayen i yesɛan azal meɛna d Illu yessegmuyen. ⁸ Win itteẓẓun d win yesswayen ɛedlen ; mkul yiwen ad as-irr Yillu akken yuklal di lxedma-s. ⁹ Axaṭer aql-aɣ neddukel d iqeddacen ɣef lecɣal n Yillu. Kunwi d iger i ixeddem Yillu, d axxam i ibennu. ¹⁰ S ṛṛeḥma i yi-d-ifka Yillu, am umusnaw n lebni, nekk sserseɣ lsas, wayeḍ ibna fell-as ; meɛna yal yiwen ad iḥader amek ara yebnu. ¹¹ Yiwen ur izmir ad issers lsas nniḍen deg wemkan n win yersen yakan : Yeɛni Ɛisa Lmasiḥ. ¹² Win yebnan ɣef lsas-agi ama s uṛeɣ, ama s lfeṭṭa, ama s yeẓra ɣlayen, ama s wesɣaṛ neɣ s usaɣuṛ d walim, ¹³ mkul yiwen ad d-iban ccɣel-is ass n lḥisab, axaṭer mkul ccɣel ad iɛeddi di tmes ; d times ara d-ibeggnen lecɣal n yal yiwen ma ṣeḥḥan neɣ ur ṣeḥḥan ara. ¹⁴ Win yebnan ɣef lsas, ur tečči ara tmes ayen akken ibna, ad t-id-yaweḍ lxir ameqqran ; ¹⁵ ma d win iwumi tečča tmes ayen yexdem, ad as-iṛuḥ lxir-is ; ma d netta ad ittusellek, am win izegren times imneɛ.

²¹ Ḥadret ad yili win ara izuxxen s yimdanen, axaṭer kullec d ayla-nwen ; ²² Bulus, Abulus neɣ Buṭrus, ddunit, tudert, lmut, lweqt-a d lweqt i d-iteddun, kullec d ayla-nwen ; ²³ kunwi d ayla n Lmasiḥ, Lmasiḥ d ayla n Yillu.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed si teqṣiḍt-agi ɣef wamek ara nili d timezgida?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.