1
2
3
4
5
6
7
8
⁸ Sfuglet i Umeɣlal, nedhet s yisem-is ! Berrḥet s lecɣal-is gar yigduden ! ⁹ Cnut-as ! Hellelet ɣef ddemma-s, meyyzet ɣef leɛǧayeb-is meṛṛa ! ¹⁰ Zuxxet s yisem-is imqeddes ! Ad yefṛeḥ wul n wid yettnadin ɣef Umeɣlal ! ¹¹ Nadit ɣef Umeɣlal d tezmert-is, ttqellibet yal ass ɣef wudem-is. ¹² Mmektit-d leɛǧayeb i yexdem, lmuɛǧizat-is d izarafen n yimi-s. ¹³ Kunwi a tarwa n Isṛail aqeddac-is ; Kunwi ay arraw n Yaɛqub i yextaṛ ! ¹⁴ D netta i d Ameɣlal, Illu-nneɣ, izarafen-is ɣef ddunit meṛṛa. ¹⁵ Ttmektit-d tamsisit-is i dayem, d wawal-is i walef n tsuta. ¹⁶ Tamsisit-nni i yexdem akked Ibrahim, d lɛahed i yefka i Isḥaq. ¹⁷ Ifka-tt-id d asaḍuf i Yaɛqub, d tamsisit ur nfennu i wat Isṛail, ¹⁸ mi yenna : “Ad ak-fkeɣ tamurt n Kanɛan, d amur n lweṛt ara tkesbem.” ¹⁹ Imir-nni llan di drus yid-sen, d takemmict kan n iminigen, ²⁰ leḥḥun si lǧens ɣer wayeḍ, si tgelda ɣer tayeḍ. ²¹ Lameɛna ur yeǧǧi yiwen ad ten-iqheṛ, ɣef ddemma-nsen yezzem igelliden mi yenna : ²² Ur ttnalet ara wid xtaṛeɣ, ur xeddmet ara cceṛ i lanbiya-w ! ²³ Cnut i Umeɣlal, ay imezdaɣ n ddunit meṛṛa ! Mkul ass, ttberriḥet s leslak-is ! ²⁴ Ḥkut ɣef tmanegt-is i leǧnas meṛṛa, ɣef leɛǧayeb-is i yigduden meṛṛa ! ²⁵ Axaṭer Ameɣlal meqqer yerna yuklal leḥmadi, muhab ugar n iṛebbiten meṛṛa. ²⁶ Axaṭer iṛebbiten meṛṛa n yigduden, d iṛebbiten n lekdeb ; ma d Ameɣlal ixleq igenwan. ²⁷ Ittfeǧǧiǧ s tmanegt d ccbaḥa, tazmert d lfeṛḥ deg wemkan anda yella. ²⁸ Hibet Ameɣlal ay iderman n yigduden, hibet Ameɣlal ɣef tmanegt-is d tezmert-is ! ²⁹ Hibet Ameɣlal ɣef tmanegt n yisem-is ! Awit-d tikciwin tasem-d ɣer zdat-s, Anzet zdat n Umeɣlal di tilin-ines iqedsen ! ³⁰ Rgigit zdat-s ay imezdaɣ n ddunit meṛṛa ! Ddunit terked, ur tettenququl ara. ³¹ Ad feṛḥen igenwan, ad tennecṛaḥ lqaɛa ! Ad inin gar yigduden : Ameɣlal d agellid ! ³² Ad isseqseq yilel s wayen meṛṛa i t-iččuṛen ! Ad yefṛeḥ lexla s wayen meṛṛa yellan deg-s ! ³³ Ad ɛeggḍent s lfeṛḥ ttjuṛ n teẓgi zdat n Umeɣlal, axaṭer yusa-d ad iḥaseb ddunit. ³⁴ Ḥemdet Ameɣlal, axaṭer yelha, axaṭer ṛṛeḥma-s tettdum i dayem ! ³⁵ Init : Sellek-aɣ, ay Illu n leslak-nneɣ, jemɛ-aɣ-d, ssukes-aɣ-d si leǧnas, i wakken ad neḥmed isem-ik imqeddes, yerna ad nzuxx s leḥmadi-inek ! ³⁶ Yettubarek Umeɣlal, Illu n Isṛail, si zik i lebda ! Agdud meṛṛa yenna : Amin ! Dɣa ḥemden Ameɣlal !
Bible en kabyle © Alliance biblique universelle, 2024. Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.
1
2
3
4
5
6
7
8
0:00
0:00