Timezgida tettẓalla lwaḥid

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

²³ Mi sen-serrḥen, ṛuḥen ɣer watmaten, ḥkan-asen akk ayen i sen-d-nnan imseflen imeqqranen d imṛayen. ²⁴ Mi slan watmaten-nni i wayen i d-inna Buṭrus, akken ma llan neddhen s yiwet n taɣect ɣer Yillu nnan : Ay Ameɣlal, kečč i ixelqen igenni, lqaɛa, ilel d wayen akk yellan. ²⁵ D kečč i d-ineṭqen s Ṛṛuḥ-ik imqeddes seg yimi n jeddi-tneɣ Dawed aqeddac-ik, mi d-inna : Acuɣer ccwal-agi gar leǧnas, acuɣer igduden ggaren-d anagar yir ixemmimen ? ²⁶ Igelliden n ddunit heggan iman-nsen, imeqqranen dduklen akk, ffɣen-d d iɛdawen n Umeɣlal akked Lmasiḥ-ines. ²⁷ Axaṭer d tidett, di temdint-agi, Hirudus d Bilaṭus mcawaṛen, dduklen nutni d ibeṛṛaniyen akked wat Isṛail, uɣalen d iɛdawen n Sidna Ɛisa, aqeddac-ik imqeddes i textaṛeḍ. ²⁸ Ayen akka xedmen, d ayen akken i tqesdeḍ keččini di lebɣi-inek, s tezmert-ik, si zik. ²⁹ I tura, ay Ameɣlal, wali-d amek akka i aɣ-ssagaden ; efk-aɣ-d ay Ameɣlal tazmert s wayes ara nbecceṛ awal-ik s ṭṭmana mebla akukru. ³⁰ Ssers-d afus-ik i wakken ad ḥlun imuḍan, i wakken ad d-ilint licaṛat d lbeṛhanat s yisem n Sidna Ɛisa aqeddac-ik imqeddes. ³¹ Mi fukken taẓallit, amkan-nni anda nnejmaɛen irgagi ; ččuṛen akk s Ṛṛuḥ imqeddes, bdan ttbecciṛen awal n Yillu s ṭṭmana mebla tuggdi.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed si teqṣiḍt-agi ɣef wamek ara nili d timezgida?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.