Timezgida tettmuddu mebla leḥsab

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

³² Wid akk yumnen s Lmasiḥ, dduklen akk s yiwen n wul, s yiwen n ṛṛuḥ, ula d yiwen deg-sen ur iḥsib ayen yesɛa d ayla-s i yiman-is kan, meɛna cerken kullec wway gar-asen. ³³ Imceggɛen ttcehhiden-d ɣef ḥeggu n Sidna Ɛisa s tezmert tameqqrant yerna ṛṛeḥma n Yillu txeddem deg-sen s lǧehd. ³⁴ Yiwen deg-sen ur ixuṣṣ di kra ; axaṭer wid akk yesɛan tiferkiwin neɣ ixxamen znuzun-ten, ttawin-d idrimen n wayen i zzenzen, ³⁵ ttaken-ten i yimceggɛen, nutni feṛṛqen-ten i mkul yiwen ɣef leḥsab n wakken yeḥwaǧ. ³⁶ Yusef yellan n wat Lawi iwumi semman imceggɛen Barnabas, (yeɛni argaz inehhun) i ilulen di tegzirt n Qubṛus, ³⁷ yesɛa yiwet n tferka, izzenz-itt, iwwi-d idrimen-nni, yefka-ten i yimceggɛen.

¹ Nebɣa ad kkun-nesseɛlem ay atmaten ɣef wayen yeɛnan ṛṛeḥma i d-ifka Yillu i tejmuyaɛ n imasiḥiyen yellan di tmurt n Masidunya ; ² ttwajeṛṛben s waṭas n lmeḥnat, lameɛna lfeṛḥ-nsen ittnerni. Ɣas akken d igellilen i llan yerna xuṣṣen aṭas, seddqen mebla cceḥḥa ; ³ fkan-d ayen iwumi zemren ; aql-iyi d inigi, zemreɣ ad d-iniɣ fkan-d nnig n tezmert-nsen yerna xedmen ayagi s lebɣi-nsen. ⁴ Ssutren-aɣ-d s uḥellel i wakken ad sen-nexdem lemziya ad d-fken ula d nutni amur-nsen n ssadaqa-agi i njemmeɛ i wakken ad tt-nawi i watmaten n tmurt n Yahuda yellan di lexṣaṣ. ⁵ Zwaren deg iman-nsen mi fkan tudert-nsen i Ṛebbi, imiren s lebɣi n Yillu, rnan qeddcen fell-aɣ seg ul ; ayagi sennig wayen nessaram ! ⁶ S wakka ihi, nweṣṣa gma-tneɣ Tiṭus ad ikemmel lxedma-nni i yebda ɣuṛ-wen ɣef wayen yeɛnan ssadaqa-agi. ⁷ Am akken i tzewṛem di kullec, ama di liman neɣ deg wawal, ama di tmusni neɣ di lemḥibba i tesɛam ɣuṛ-neɣ, zewṛet daɣen di temsalt yeɛnan ssadaqa. ⁸ Mačči d lameṛ i bɣiɣ ad wen-d-fkeɣ ; ḥkiɣ-awen-d amek i zewṛen wiyaḍ, i wakken ad kkun-jeṛṛbeɣ ma tesɛam leḥmala n tidett neɣ ala. ⁹ Tessnem ṛṛeḥma n Ssid-nneɣ Ɛisa Lmasiḥ yellan d Bab n lerbaḥ n ddunit meṛṛa, yuɣal d igellil ɣef ddemma-nwen i wakken ad kkun-isserbeḥ s tigellelt-ines. ¹⁰ Ad wen-d-fkeɣ ṛṛay-iw deg wayagi axaṭer d ayen i wen-ilhan : Aseggas iɛeddan, d kunwi i d imezwura i yebɣan ad tɛiwnem atmaten n tmurt n Yahuda yellan di lexṣaṣ, d kunwi daɣen i d imezwura i yebdan tjemmɛem-d ssadaqa-agi ; ¹¹ ihi tura kemmlet ccɣel-agi i tebdam, s wayen iwumi tzemrem ; am akken i t-tebdam seg ul, kemmlet-tt s wul. ¹² Illu iqebbel ssadaqa-nneɣ, lameɛna ɣef wakken tella tezmert-nneɣ, mačči sennig wayen nezmer. ¹³ Ur nebɣi ara ad d-nini xlut ixxamen-nwen i wakken ad tɛiwnem wiyaḍ, lameɛna i wakken ad temɛadalem ; ¹⁴ ayen tesɛam d zzyada ad infeɛ wid ixuṣṣen tura, i wakken asmi ara txuṣṣem kunwi, ad kkun-ɛiwnen s wayen sɛan d zzyada ; s wakka ihi ad temɛadalem, ¹⁵ akken yura : Win yesɛan aṭas ur isɛi ara zzyada, ma d win yesɛan cwiṭ ur t-ixuṣṣ kra.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed si teqṣiḍt-agi ɣef wamek ara nili d timezgida?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.