Timezgida ur tezmir ara ad teskiddeb i Ṛebbi | Anarni am tejmaɛt n Yasuɛ | Kabyle (Algerian Tamazight)

Fellowship

1

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

2

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

3

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

4

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

5

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

6

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

7

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

8

Tura, eyyaw a nɣer teqṣiḍt n wass-a sɣur Ṛebbi...

Lecɣal n Imceggɛen 5: 1-11

¹ Yiwen wergaz isem-is Ananyas, netta d tmeṭṭut-is Safira zzenzen yiwen n weḥric seg wakal-nsen ; ² msefhamen ad kksen yiwen n umur si ssuma n lbiɛ-nni ; amur nniḍen iwwi-t-id ɣer ifassen n imceggɛen. ³ Buṭrus inṭeq ɣuṛ-s inna : Ay Ananyas, acuɣer i teǧǧiḍ cciṭan iččuṛ ul-ik ? Acuɣer i teskaddbeḍ i Ṛṛuḥ imqeddes mi tekkseḍ yiwen umur n yedrimen n wakal i tezzenzeḍ ? Uqbel ad t-tezzenzeḍ, akal-nni yella d ayla-k ! ⁴ Mi t-tezzenzeḍ, idrimen-nni daɣen d ayla-k ! Amek armi i tessawḍeḍ ad txedmeḍ yiwet n lḥaǧa am tagi ? Ihi mačči i yimdanen iwumi teskaddbeḍ, lameɛna i Yillu ! ⁵ Mi yesla i yimeslayen-nni, Ananyas yeɣli, iffeɣ-it ṛṛuḥ, yemmut. Wid akk yellan dinna, ikcem-iten akk lxuf, ttergigin. ⁶ Kkren ilmeẓyen kefnen-t, wwin-t ad t-meḍlen. ⁷ Ɛeddant wazal n tlata sswayeɛ, mi d-tekcem tmeṭṭut n Ananyas, nettat ur tesli ara s wayen iḍran. ⁸ Buṭrus inṭeq ɣuṛ-s inna-yas : Ini-yi-d, s ssuma-yagi i tezzenzem akal-nwen ? Terra-yas-d : Ih, s ssuma-yagi i t-nezzenz. ⁹ Dɣa Buṭrus inna-yas : Amek armi i temsefhamem i wakken ad tjeṛṛbem Ṛṛuḥ n Umeɣlal ? Wid imeḍlen argaz-im ha-ten-an ɣer tewwurt, ad kkem-awin ula d kemm ! ¹⁰ Imiren kan teɣli ɣer iḍarren-is iffeɣ-itt ṛṛuḥ, temmut. Ilmeẓyen-nni mi d-kecmen ufan-tt-id temmut, wwin-tt meḍlen-tt ɣer tama n wergaz-is. ¹¹ Teɣli-d rrehba d tameqqrant di tmezdayt ɣef wid akk i yeslan s wayen yeḍran.

Bible en kabyle © Alliance biblique universelle, 2024. Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.

Application

1

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

2

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

3

D acu i nelmed ɣef yimdanen, gar-asen ula d nekni, seg teqṣiḍt-agi?

4

Acu i d-nelmed si teqṣiḍt-agi ɣef wamek ara nili d timezgida?

5

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

6

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

7

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

8

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.