Timezgida tettqabal ddnub

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹⁵ Ma twalaḍ gma-k idneb, ṛuḥ ṭṭef-it weḥd-s, nhu-t. Ma yuɣ-ak awal, atan trebḥeḍ-d gma-k ! ¹⁶ Meɛna ma igguma ad ak-d-isel, awi yiwen neɣ sin yimdanen yid-k, i wakken ad tefru temsalt ɣef cchada n sin neɣ tlata inagan. ¹⁷ Ma yugi ad sen-isel, init i tmezdayt, ma ur iḥess ara ula i tmezdayt, ḥseb-it am akken d akafriw neɣ d amekkas n tebzert !

¹ Slan di yal amkan s tecmatin iḍran gar-awen, d ayen ur nettaf ula ɣer leǧnas ur numin ara, tessawḍem armi yiwen deg-wen ittɛacaṛ tameṭṭut n baba-s ! ² Yerna mazal-ikkun tettzuxxum ! Yewwi-d ad tilim di leḥzen, argaz i ixeddmen annect-agi ilaq ad t-tessufɣem si gar-awen ; ³ ma d nekk ɣas beɛdeɣ fell-awen s tfekka meɛna leɛqel-iw yid-wen i yella ; atan sḍelmeɣ win ixedmen lɛaṛ-agi am akken lliɣ yid-wen. ⁴ Mi ara tennejmaɛem s yisem n Sidna Ɛisa Lmasiḥ, ad iliɣ yid-wen s ṛṛuḥ, s tezmert n Sidna Ɛisa, ⁵ ssufɣet akkin argaz am wagi, sellmet-tt i tezmert n cciṭan ad issenger tafekka-s i wakken ṛṛuḥ-is ad ittwisellek ass n tuɣalin n Ssid-nneɣ. ⁶ Ad wen-d-iniɣ : Zzux-agi-nwen ur imɛin ara ! Ɛni ur tessinem ara lemtel i d-iqqaren : “Cwiṭ n temtunt tessalay arekti meṛṛa ?” ⁷ Ssizedget iman-nwen seg temtunt taqdimt i wakken ad tilim d arekti amaynut, imi aql-ikkun mebla tamtunt ; axaṭer Lmasiḥ yellan d Lɛid-nneɣ n leslak, ittunefk d asfel ɣef ddemma-nneɣ. ⁸ Tura ihi ad nkemmel lɛid n weɣṛum mebla tamtunt, mačči tamtunt-nni ixesṛen yellan d ddnub akked cceṛ, meɛna s weɣṛum ur nesɛi tamtunt, yellan d ṣṣfawa akked tidett. ⁹ Di tebṛatt-nni i wen-n-uriɣ, nniɣ-awen-d ur teddut ara d wid ittɛicin di leḥṛam. ¹⁰ Ur wen-d-nniɣ ara annect-agi ɣef wat ddunit ittɛicin di leḥṛam, iččuṛen d ṭṭmeɛ, d lexdeɛ d tukerḍa, ittɛebbiden lmeṣnuɛat, neɣ ma ulac ilaq-awen ad teffɣem si ddunit-agi. ¹¹ Meɛna nniɣ-awen-d : Ur ttemxalaḍet ara d win ittarran iman-is d amasiḥi yili netta ittɛici di leḥṛam, iččuṛ d ṭṭmeɛ, d lexdeɛ, iheddeṛ ɣef wiyaḍ, iɛebbed lmeṣnuɛat, d asekṛan, d amakar. Ur ttɣimit ara d wergaz am wagi ula ɣer lqut. ¹² Acu ara aɣ-yawin ad nḥaseb wid n beṛṛa ? Ɛni mačči d wid yellan gar-awen i ilaq ad tḥasbem ? ¹³ Wid n beṛṛa d Illu ara ten-iḥasben. Meɛna akken yura di Tira Iqedsen : Stixxṛet amcum si gar-awen.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed si teqṣiḍt-agi ɣef wamek ara nili d timezgida?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.