Timezgida tqeddec ɣef wiyaḍ

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

³¹ Asmi ara d-yas Mmi-s n wemdan di tmanegt-is netta d lmalayek meṛṛa, ad iqqim ɣef ukersi n tgeldit-is n tmanegt ; ³² leǧnas meṛṛa ad d-nnejmaɛen zdat-s, ad ten-ifṛeq am umeksa i iɛezzlen ulli ɣef tɣeṭṭen. ³³ Ad irr ulli ɣer uyeffus-is, tiɣeṭṭen ɣer uzelmaḍ-is. ³⁴ Imiren agellid ad yini i wid yellan ɣer uyeffus-is : Aset-d a kunwi iburek Baba, ad tweṛtem tagelda i wen-ittuheggan seg wasmi i tebda ddunit. ³⁵ Axaṭer lliɣ lluẓeɣ tefkam-iyi ččiɣ, ffudeɣ tefkam-iyi swiɣ, usiɣ-d d abeṛṛani testeṛḥbem yis-i, ³⁶ lliɣ d aɛeryan tesselsem-iyi, d amuḍin telham-d yid-i, lliɣ daɣen d ameḥbus tusam-d teẓram-iyi. ³⁷ Imiren iḥeqqiyen ad as-d-rren : A sidi, melmi i ak-neẓra telluẓeḍ, nefka-yak teččiḍ ? Neɣ neẓra-k teffudeḍ nefka-yak teswiḍ ? ³⁸ Melmi daɣen i d-tusiḍ d abeṛṛani nesteṛḥeb yis-k, neɣ melmi i ak-nwala d aɛeryan, nessels-ik ? ³⁹ Melmi i ak-neẓra d amuḍin neɣ di lḥebs nusa-d ɣuṛ-k ? ⁴⁰ Agellid ad sen-d-yerr : Ad wen-iniɣ tidett, yal tikkelt ideg txedmem ayagi i yiwen seg imecṭuḥen-agi yellan d atmaten-iw, i nekk iwumi t-txedmem. ⁴¹ Imiren ad yini i wid yellan ɣer uzelmaḍ-is : Beɛdet akkin fell-i a kunwi yettwaneɛlen, ṛuḥet ɣer tmes n dayem yettwaheggan i cciṭan d wid i t-tebɛen. ⁴² Axaṭer lliɣ lluẓeɣ ur iyi-tesseččem ara, ffudeɣ ur iyi-tefkim ara ad sweɣ, ⁴³ usiɣ-d d abeṛṛani ur testeṛḥbem ara yis-i, lliɣ d aɛeryan ur iyi-tesselsem ara, lliɣ daɣen d amuḍin, d ameḥbus, ur d-tusim ara ad testeqsim fell-i. ⁴⁴ Imiren ula d nutni ad as-d-rren : A sidi, melmi i ak-neẓra telluẓeḍ neɣ teffudeḍ, d abeṛṛani neɣ d aɛeryan, d amuḍin neɣ d ameḥbus, ur d-nelhi ara yid-k ? ⁴⁵ Netta ad sen-d-yerr : Ad wen-iniɣ tidett : Yal tikkelt ideg ur texdimem ara ayagi i yiwen seg imecṭuḥen-agi, i nekk iwumi ur t-texdimem ara. ⁴⁶ Imiren widak-agi ad kecmen ɣer lɛiqab ur nfennu, ma d iḥeqqiyen ad kecmen ɣer tudert n dayem !

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed si teqṣiḍt-agi ɣef wamek ara nili d timezgida?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.