Timezgida tettceggiɛ iqeddacen ɣer beṛṛa

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹ Di tmezdayt n Anṭakya llan lanbiya d imusnawen n ṭawrat : Barnabas, Semɛun ittusemman Aberkan, Lusyus n temdint n Qiṛwan, Manahen i d-ittuṛebban d Hirudus Antibas, akked Cawul. ² Yiwen wass atmaten nnejmaɛen i wakken ad uẓumen yerna ad ɛebden Ṛebbi. Ṛṛuḥ imqeddes inna-yasen-d : Swejdet-iyi-d Barnabas akked Cawul i ccɣel-nni iwumi i ten-heggaɣ. ³ Mbeɛd mi ẓummen yerna ẓẓullen, ssersen ifassen-nsen fell-asen, imiren ǧǧan-ten ad ṛuḥen. ⁴ Barnabas akked Cawul i iceggeɛ Ṛṛuḥ imqeddes, ṣubben ɣer lmeṛsa n Sulukiya ; syenna rekben di lbabuṛ ɣer tegzirt n Qubṛus.

¹⁶ i lliɣ d aqeddac n Ɛisa Lmasiḥ ɣef leǧnas nniḍen. Tura ccɣel-iw, d abecceṛ n Lexbeṛ n Lxir n Yillu i leǧnas ur nelli ara n wat Isṛail, i wakken igduden meṛṛa ad uɣalen d lweɛda yeṣfan s Ṛṛuḥ imqeddes, d lweɛda ara iɛeǧben i Yillu. ¹⁷ S wakka, di tikli-inu akked Ɛisa Lmasiḥ, zemreɣ ad d-iniɣ : Feṛḥeɣ s lxedma i yi-d-ifka Yillu. ¹⁸ Axaṭer ma yella wayen i ɣef ara d-ḥkuɣ, ad d-ḥkuɣ kan ɣef wayen i yexdem Sidna Ɛisa yis-i, ama s imeslayen ama s lecɣal i wakken igduden ur nelli ara n wat Isṛail ad ḍuɛen Illu. ¹⁹ S licaṛat d lbeṛhanat i d-iḍerrun s tezmert n Ṛṛuḥ imqeddes, i beccṛeɣ Lexbeṛ n Lxir n Lmasiḥ si temdint n Urucalim armi d tamurt n Illirya di mkul amkan. ²⁰ Xedmeɣ lmeǧhud-iw i wakken ad beccṛeɣ Lexbeṛ n Lxir anagar anda ur ittwassen ara Lmasiḥ i wakken ur bennuɣ ara ɣef lsas sbedden wiyaḍ ; ²¹ xedmeɣ am akken yura di tektabt n nnbi Icaɛya : Wid iwumi ur ittwabecceṛ ara, ad walin ; wid ur nesli ara yis, ad fehmen.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed si teqṣiḍt-agi ɣef wamek ara nili d timezgida?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.