Imḍebbṛen ttwellihen medden ɣer Yasuɛ

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹⁹ Atah wamek i yeched Yeḥya asmi i d-ceggɛen ɣuṛ-s lḥekkam n wudayen si temdint n Urucalim. Ceggɛen-d ɣuṛ-s tajmaɛt n imseflen akked yemṛabḍen n wat Lawi akken ad t-steqsin, nnan-as : Anwa-k keččini ? ²⁰ Inna-yasen tidett mebla tuffra : Mačči d nekk i d Lmasiḥ ! ²¹ Rnan steqsan-t : Anwa-k ihi ? D kečč i d nnbi Iliya ? Yeḥya inna-yasen : Xaṭi mačči d nekk. Netni rnan nnan-as : D nnbi i telliḍ ? Netta irra-yasen : Xaṭi ! ²² Rnan ḥerṣen-t nnan-as : Anwa-k ihi ? Ilaq ad nerr lexbeṛ i wid i aɣ-d-iceggɛen. D acu i teqqareḍ ɣef yiman-ik ? ²³ Yeḥya inna-yasen : Nekk d taɣect n win ittɛeggiḍen deg unezruf : Heggit abrid i Umeɣlal ! Akken i t-d-inna nnbi Icaɛya. ²⁴ Wid i d-yusan ɣuṛ-s i yellan di tejmaɛt n ifariziyen, ²⁵ rnan steqsan-t nnan-as : Imi ur telliḍ ara d Lmasiḥ neɣ d nnbi Iliya neɣ d nnbi nniḍen, iwacu ihi i tesseɣḍaseḍ lɣaci deg waman ? ²⁶ Yeḥya irra-yasen : Nekk sseɣḍaseɣ-kkun deg waman ; yella gar-awen yiwen ur t-tessinem ara, ²⁷ usiɣ-d uqbel-is, lameɛna ur uklaleɣ ara ad fsiɣ ulamma d lexyuḍ n warkasen-is. ²⁸ Annect-agi meṛṛa iḍra di taddart n Bitanya ɣer tama n usamar n wasif n Urdun anda i yesseɣḍas Yeḥya lɣaci. ²⁹ Azekka-nni, Yeḥya iwala Sidna Ɛisa iteddu-d ɣuṛ-s, inṭeq s ṣṣut ɛlayen : Atah Izimer n Yillu, d win ittekksen ddnub n ddunit. ³⁰ Fell-as i wen-d-nniɣ : “Ad d-yas yiwen, zwareɣ-t-id meɛna yella uqbel ad d-iliɣ.” ³¹ Nekk s yiman-iw ur ẓriɣ ara anwa-t meɛna usiɣ-d ad sɣeḍseɣ deg waman akken ad t-issinen wat Isṛail. ³² Yeḥya yerna inna-d : Walaɣ Ṛṛuḥ imqeddes iṣubb-d seg igenni s ṣṣifa n tetbirt yers-d fell-as. ³³ Nekk ur ẓriɣ ara d akken d netta, meɛna Illu i yi-d-iceggɛen i wakken ad sɣeḍseɣ deg waman, inna-yi-d : “Ad twaliḍ Ṛṛuḥ iṣubb-d seg igenni, ad d-irs ɣef yiwen wergaz, d netta ara yesɣeḍsen imdanen s Ṛṛuḥ imqeddes.” ³⁴ Ayagi d ayen i ẓrant wallen-iw, daymi i d-cehdeɣ fell-as qqareɣ : Argaz-agi d Mmi-s n Yillu. ³⁵ Azekka-nni, Yeḥya mazal-it dinna netta d sin seg inelmaden-is. ³⁶ Akken i iwala Sidna Ɛisa iɛedda-d, inna-yasen : Atan Izimer n Yillu ! ³⁷ Mi slan i yimeslayen-agi, inelmaden-nni tebɛen Sidna Ɛisa.

²⁶ Ṛuḥen ɣer Yeḥya, nnan-as : A Sidi, win yellan yid-k mi telliḍ agemmaḍ i wasif n Urdun, win akken i ɣef d-tcehhdeḍ, atan isseɣḍas ula d netta, lɣaci meṛṛa ttṛuḥun ɣuṛ-s. ²⁷ Yeḥya irra-yasen : Yiwen ur izmir ad ixdem ccɣel nniḍen sennig wayen i as-d-ifka Yillu. ²⁸ Aql-ikkun s yiman-nwen d inagan, acḥal d abrid i wen-d-nniɣ : Mačči d nekk i d Lmasiḥ, lameɛna ttwaceggɛeɣ-d kan uqbel-is. ²⁹ Win uɣuṛ tella teslit, d netta i d isli ! Ma d aḥbib n yesli yettɣimin ɣer tama-s, i as-isellen, ifeṛṛeḥ s lfeṛḥ ameqqran s ṣṣut n isli. D wagi i d lfeṛḥ-iw yerna innekmal. ³⁰ Ilaq netta ad ittimɣuṛ nekk ad ttimẓiyeɣ.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed seg teqṣiḍt-agi ɣef wamek ara nili d imḍebbren?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.